Nuk ka më dilema, Xhuliano Skuka është lojtari më i ri i Partizanit. Lajmin e ka konfirmuar vetë klubi përmes një njoftimi në rrjetet sociale.
Skuka vjen në formë huazimi pas marrëveshjes mes klubit francez të Metzit dhe Partizanit, marrëveshje e vlefshme deri në fund të këtij sezoni.
Sulmuesi ishte pjesë e kryeqytetasve në sezonin 2022-23, ku në 37 ndeshje realizoi 19 gola përpara se të largohej për në Francë.
“Partizani me kënaqësi zyrtarizon rikthimin e Xhuliano Skukës. Klubi dhe Metz kanë arritur marrëveshjen mes tyre për huazimin e sulmuesit 25 vjeçar te kampionët. Skuka do të jetë pjesë e të kuqve deri në përfundim të sezonit 2023-2024 duke konfirmuar se Partizani mbetet zgjedhja e parë në Shqipëri” – shkruan klubi.
Me interes pritet të shihet integrimi i tij me grupin dhe tashmë tifozët kanë një arsye më shumë për të besuar te skuadra. Ndeshja e radhës për Partizanin është ajo ndaj Teutës me 13 janar, në orën 17.00.
