Kryedemokrati Sali Berisha, nën arrest, ka reaguar për vetëvrasjen e 41-vjeçares Bedrie Loka, e cila la pas katër fëmijë.
Berisha ka drejtuar gishtin e akuzës mbi segmentet e korruptuara të Policisë së Shtetit, “narko-banditët me uniformë”, që e shpërfillën denoncimin dhe dhimbjen e saj kur iu kërkoi mbrojtje.
Reagimi i plotë:
Të dashur miq, një nënë me katër fëmijë i dha fund jetës në mënyrë tragjike pas rëndimit të gjendjes së saj psikologjike nga sulmet shqetësuese që i bëheshin në TikTok nga anonimë mizorë. Ajo prej kohësh kishte kërkuar mbrojtje nga këto sulme, te narko-banditë me uniformë, por natyrisht kërkesa e saj ishte shpërfillur me cinizëm në pafundësi. Por ky është vetëm krimi i shëmtuar i radhës ndaj femrës shqiptare.
Janë jo një, por disa gra të cilat edhe pasi kanë marrë mbrojtje me vendim gjykate kanë rënë viktimë e plumbave apo thikave të kriminelëve ndaj të cilëve kishin kërkuar mbrojtje.
I shpreh ngushëllimet më të ndjera familjes dhe dënoj me ashpërsinë më të madhe indiferencën e vrasësve edhe bashkëpunimin e banditëve me uniformë me vrasësit.
