Mbështetës demokratë të ish-kryeministrit Sali Berisha janë mbledhur edhe këtë të premte poshtë banesës së tij në shenjë solidarizimi ndaj masës ‘arrest në shtëpi’ të caktuar nga GJKKO, për liderin opozitar.
I pranishëm në tubim ishte edhe ish-ministri Genc Pollo, i cili u shpreh se rruga drejt qëllimit nuk do jetë e lehtë, apo e shkurtër, por nuk ka rrugë dhe mënyrë tjetër.
“Nuk e kishim menduar se pas 33 vitesh drejtuesi i opozitës do ishte në arrest shtëpie. Ky përvjetor i Rilindjes së PD-së është më domethënës se më parë. Ata që thonë ‘në fund të fundit foli drejtësia’, janë njerëz që të njëjtën gjë mund ta thonin për gjyqin që i’u bë deputetëve të tjerë dekada më parë. Është kohë për të thënë se aktakuzat janë turp. Nuk po them se rruga jonë drejt këtij qëllimi do jetë e lehtë apo e shkurtër, por nuk shoh rrugë tjetër. Tjetër mënyrë nuk ka.”, u shpreh Pollo.
