Analisti Ylli Rakipi ka dalë kundër vendimit të GJKKO-së për masën e arrestit ndaj ish-kryeministrit Sali Berisha.
Rakipi tha në emisionin e Çim Pekës se vendimi i sotëm është një rast i paprecedentë që na damkos shumë.
“Donald Trump nuk shkon në burg edhe pse ka dhjetëra e dhjetëra hetime dhe akuza penale. Por Sali Berisha, duam apo nuk duam ne, është kryetari i opozitës në Shqipëri. Pra, nuk po mbyllet brenda një kriminel, nuk po mbyll brenda një njeri nën akuzë, por mbyll një njeri në hetim dhe i thua do rrish brenda dhe nuk do flasësh se dua unë. Ky është një rast i paprecedentë që na damkos shumë. Është për të qeshur dhe për të qeshur”, u shpreh ai.
Izolimin e Berishës, analisti e sheh si një tentativë të kryeministrit Edi Rama për të ndërtuar një opozitë të tijën.
“Veprimi është i paprecedent, është i pajustifikueshëm. Është ndaluar kryetari i opozitës të mos flasë, të mos hapë gojën. Dhe paralel me këtë sot, ka dalë Edi Rama dhe ka thënë që Lul Basha po fle gjumë. Domethënë duket që edhe pushteti kërkon të ndërtojë opozitën, Edi Rama kërkon të ndërtojë opozitën. Të kyçin Sali Berishën dhe opozita më e mirë për të dalë është Lulzim Basha. Nuk shkon kjo gjë”, theksoi Rakipi.
