Një i ri është plagosur me armë zjarri këtë të enjte në Fier nga një efektiv policie në detyrë, në vazhdën e një konflikti që dyshohet se ka lindur për motive të dobëta.
Ngjarja ka ndodhur në qendër të qytetit rreth orës 19:20, ku një patrullë policie me shërbim kishte bllokuar një segment rrugor për zhvillimin e një koncerti.
Sipas burimeve zyrtare nga policia lokale, 26-vjeçari me iniciale D.B., duke drejtuar një automjet tip ‘Volkswagen’ është afruar te punonjësit e Policisë dhe ka tentuar të futet në rrugën e bllokuar.
“Punonjësit e Policisë nuk e kanë lejuar të futet brenda perimetrit të sigurisë dhe në atë momentet shtetasi D.B. ka dalë nga automjeti dhe ka qëlluar me grushte në fytyrë duke i shkaktuar dëmtime të rënda në fytyrë dhe në gojë. Inspektor Sh.J., në kushtet e vetëmbrojtjes ka qëlluar me armën e shërbimit duke e plagosur në këmbë shtetasin D.B.”, thuhet në një njoftim të bluve.
Efektivët e tjerë të policisë kanë dërguar për në spital për ndihmë mjekësore të riun nga Levani, i cili është djali i një kolegu të tyre. I lënduari, sipas burimeve mjekësore, është jashtë rrezikut për jetën.
Po ashtu, është shoqëruar në spital për ndihmë mjekësore dhe punonjësi i Policisë që qëlloi me armën e shërbimit, i cili dhe pas marrjes së ndihmës mjekësore është shoqëruar në komisariat.
“Të gjitha veprimet po kryhen nga Agjencia e Mbikëqyrjes Policore në drejtimin e Prokurorisë për shmangur konfliktin e interesit. Në përfundim të veprimeve hetimore, AMP do të japi informacion të zgjeruar në lidhje me këtë ngjarje”, mbyllet njoftimi i bluve.
