Genc Gjokutaj, avokati i kreut të PD-së, Sali Berisha ka bërë me dije se në seancën e sotme për ashpërsimin e masës së sigurisë ndaj kreut të PD-së, Sali Berisha për çështjen e privatizimit të ish-kompleksit “Partizani”, kanë kërkuar sërish përjashtimin e gjyqtares Irena Gjoka.
Sipas tij, këtë herë për shkeljet e kryera në këtë proces, pasi i rrëzonte kërkesat e palës mbrojtëse pa i parashtruar mirë ato. Sipas Gjokutajt, Irena Gjoka zbatonte autorizimet e kryeministrit Edi Rama.
Gjokutaj bëri me dije gjithashtu se i kanë kërkuar gjykatës që ta çojë në Gjykatën Kushtetuese, teksa në lidhje me “izolimin” që kërkon SPAK për Berishën, duke i ndaluar kontaktet me qytetarët, ai tha se po gabohet rëndë duke e barazuar ish-kryeministrin me trafikantë.
“Gjykata nuk e pranoi kërkesën duke thënë se hetimi është sekret. Faktet e kësaj dosjeje kanë dalë në media dhe është shuar kurioziteti për këto. Vazhduam me gjykimin incidental. I kërkuam gjykatës që ta çojë në Gjykatën Kushtetuese, e cila e ka lënë çështjen të pagjykuar në themel. Ju e dini që ata kanë vendosur moslegjitimimin e një të pestës së deputetëve dhe në mungesë të shterimit të gjykimit kushtetues që ta çojë në gjykim incidental në Gjykatë Kushtetuese. Në seancën e sotme, pa mbaruar mirë ne kërkimin vinte vendimi i gjykatës për rrëzimin e saj. Me autorizimin e Ramës, sipas atij, autorizimi vazhdoi dhe gjyqi. Kjo ka qenë edhe arsyeja e kohës. Ne kërkuam për së dyti përjashtimin e gjyqtares, pasi ajo relatoi se kërkesa jonë për përjashtimin e gjyqtares për shkak të shkarkimit nga Berisha, ky vendim është rrëzuar. Gjykata e shtyu nesër në orën 3 për shpallje, pasi e di që edhe kjo kërkesë e përjashtimit do të rrëzohet. Të gjitha kërkesat tona janë rrëzuar. Kjo gjykatë ka vendosur një precedentë duke vazhduar gjykimin me kërkesë përjashtimi të pagjykuar. Ligji thotë se kur ngrihet kërkesa për përjashtim gjykata nuk mund të marrë apo japë vendim. Shqyrtohet kërkesa njëherë pastaj jepen vendimet. Këto janë të sigurta që do të rrëzohen. Argumentet ne i kemi parashtruar te gjykata. E drejta e fjalës në cilësinë e liderit të opozitës, gjykata duhet të vlerësojë gjithë rrethanat, edhe personin me të cilin ka të bëjë. Nëse kjo gjykatë do të veprojë për Berishën njësoj siç vepron për ditë me trafikantë e persona të ngjashëm, atëherë bën një gabim të rëndë. Kjo sot ishte e barabartë me gjykatat partizane që kanë qenë dikur”, u shpreh ai.
