Ka përfunduar pas më shumë se 4 orësh evakuimi i të gjithë banorëve që ndodheshin në pallatin 12 katësh që u përfshi pasditen e sotme nga zjarri masiv.
Kjo është konfirmuar nga Policia, e cila bën me dije gjithashtu se janë dërguar në spital për ndihmë mjekësore rreth 39 qytetarë dhe 3 punonjës të zjarrfikëses, pas probleve me frymëmarrjen. Mësohet se ata ndodhen jashtë rrezikut për jetën.
Në tre katet e para të pallatit që u përfshi nga zjarri ndodhen dyqane të qendrës tregtare “Metropol” dhe në katet e tjera apartamente. Shkak i zjarrit dyshohet se ka qenë një shkëndije elektrike prej kondicionerit në një dyqan këpucësh në katin e tretë të qendrës tregtare dhe më pas zjarri është përhapur në gjithë qendrën, ndërsa tymi ka përfshirë të gjithë pallatin 12-katësh. Një lokal i cili ndodhej në katin e tretë të këtij pallati 12-katësh ka qenë i gjithi prej druri, çka dyshohet se ka përhapur edhe më shumë dhe më shpejt zjarrin në gjithë qendrën.
Policia bën me dije se grupi i posaçëm hetimor në drejtimin e Prokurorisë së Fierit vijon punën për zbardhjen e rrethanave të ngjarjes dhe përcaktimin e shkakut të rënies së zjarrit.
Njoftimii policisë
Përfundoi operacioni i evakuim shpëtimit në qendrën tregëtare në Lushnjë. Në operacion për evakuimin e qytetarëve morën pjesë Forcat Renea, Forcat e Sigurisë Kombëtare, Njësitë Shqiponja, shërbimet e Komisariatit të Policisë Lushnjë dhe zjarrfikësit.
Në vendngjarje ishin Ministri i Brendshëm Taulant Balla, Drejtori i Përgjithshëm i Policisë së Shtetit Muhamet Rrumbullaku, Zëvëndës Drejtori i Përgjithshëm Sokol Bizhga, Drejtori Vendor i Policisë Fier Lorenc Panganika, Drejtues të tjerë të DVP Fier dhe drejtues të lartë të Policisë së Shtetit.
Janë evakuuar dhe dërguar në spital për ndihmë mjekësore rreth 39 qytetarë dhe 3 punonjës të zjarrfikëses, jashtë rrezikut për jetën.
Grupi i posaçëm hetimor në drejtimin e Prokurorisë vijon punën për zbardhjen e rrethanave të ngjarjes dhe përcaktimin e shkakut të rënies së zjarrit.
