Teksa numri i turistëve pësoi rritje të ndjeshme gjatë periudhëës janar – nëntor të këtij viti, ndryshe paraqitet situata për turizmin shëndetësor. Sipas të dhënave nga Instituti i Statistikave për këtë segment u shënua një rënie me 62.2 % përgjatë 11 mujave, në raport me të njëjtën periudhë të vitit 2022.
Sipas INSTAT përgjatë periudhës janar – nëntor 2023 për trajtime shëndetësore në vendin tonë hynë 895 shtetas të huaj, nga 2367 shtetas që hynë përgjatë të njëjtës periudhë të vitit të kaluar.
Këto shifra janë tërësisht të ndryshme, në raport me vitet e kaluar kur ky lloj turizmi paraqitej gjithmonë në rritje. Në fakt, Shqipëria është parë si një vend me potencial të alrtë për zhvillimin e turizmit shëndetësor, që bëhet për të përfituar shërbime shëndetësore në një vend të ndryshëm nga vendbanimi i pacientëve.
Kjo për shkak të çmimeve të ulta, por edhe pozicionit gjeografik të favorshëm për udhëtarë nga Evropa. Fillimisht, interesi ishte më i lartë për shërbimet dentare, ndërsa më pas u shënua një rritje edhe për shërbime të tjera, sikurse është transplantimi i flokëve apo kirurgjitë kozmetike.
Ndërkaq, arsyet e rënies të këtij turizmi gjatë vitit 2023 janë ende të paqarta, teksa ato mund të lidhen me rritjen e çmimeve për shërbimet e kërkuara, por edhe me rritjen e kostos së jetesës në shumë vende të Europës, që ndikon në sjelljet konsumatore. / SCAN
