Grupi i hakerave iranianë “Homeland Justice” kanë sulmuar edhe faqen e Parlamentit. Hakerët shkruajnë në mesazhin e tyre në Telegram se “do të paguajnë edhe uzurpuesit e sediljeve të Kuvendit”.
Hakerët paralajmërojnë se shumë shpejt deputetët e korruptuar do të shkatërrohen, por nuk japin më shumë të dhëna për informacionet që kanë siguruar pas sulmeve të kryera.
“Do të paguajnë edhe uzurpuesit e sediljeve të Kuvendit!
Deputetët tanë të korruptuar së shpejti do të shkatërrohen kur të kuptojnë se si demoni i tyre i brendshëm po i demonstrohet çdo kërkuesi të së vërtetës.”– thuhet në mesazhin e tyre.
Hakerët njoftuan paraditen e sotme se kanë sulmuar kompaninë telefonike “One Albania” dhe kanë fshirë më shumë se 2 petabajt të të dhënave të rrjetit të telekomunikacionit dhe rrjetit të brendshëm të të gjitha kompanive të lidhura. Hakerët kanë paralajmëruar se të dhënat e rëndësishme që kanë siguruar do të publikohen së shpejti duke cënuar privatësinë e abonentëve të kësaj kompanie.
Hakerët thanë se kompania celulare “One Albania” ka lejuar përmes shërbimeve të saj që muxhahedinët e MEK të kryejnë sulme kibernetike dhe siç duket kjo ka qenë arsyeja pse ata e kanë sulmuar.
Më vonë, hakerët njoftuan se kanë sulmuar kompaninë ajore “Air Albania”. Ata njoftojnë se kanë akses tek të gjitha të dhënat e kompanisë.
Mesa duket, pas sulmit dhe hakerimit të të dhënave të One Albania, Air Albania dhe faqes së Parlamentit, priten edhe sulme të tjera.
LEXO EDHE:
Sulmi kibernetik, dyqanet e “One Albania” ulin qepenat, punonjësit shkojnë në shtëpi
