Diplomatja Edith Harxhi ka folur për skandalin me përfaqësitë diplomatike të Shqipërisë, konkretisht me ambasadorin e Republikës së Shqipërisë në Britani të Madhe, Uran Ferizi.
Harxhi theksoi se ka dhënë një intervistë për DailyMail ku ka thënë se kjo lëvizje e qeverisë shqiptarë nuk është korrekte diplomatikisht.
Sipas diplomates, fakti që zoti Ferizi ka hyrë ilegalisht në Britani të Madhe dhe ky nuk është një mesazh i mirë për marrëdhënien mes dy shteteve.
Harxhi: “Përpara dy ditësh jam intervistuar nga gazetari i DailyMail, ku më është kërkuar të jepja një opinion në lidhje me situatën e krijuar në Britaninë e Madhe me emërimin e ambasadorit të ri të Republikës së Shqipërisë pranë Mbretërisë së Bashkuar. Këta janë ambasadorë të oborrit mbretëror pasi dhe letrat kredenciale i paraqesin te Mbreti.
Unë nuk e dija por zoti Ferizi ka hyrë ilegalisht në Britaninë e Madhe shumë vite më parë ashtu siç kanë hyrë shumë shqiptarë fatkeqësisht pasi kjo është një dramë e madhe pasi ne nuk kemi mundur të bëjmë diçka me Britaninë e Madhe për regjimin e vizave por edhe të regullojmë emigracionin e paligjshëm në Britani.
Për mendimin tim si diplomate kjo nuk është diplomatikisht korrekte ashtu si dhe moralisht dhe etnikisht dhe për këtë arsye kam dhënë edhe këtë përgjigje për DailyMail.
Duhet të kemi parasysh se Konventa e Vienës rregullon gjithë aktivitetin diplomatik të shteteve dhe normalisht një person, shtetas i një vendi që ka nënshtetësinë e vendit që do të pritet nuk mund të shkojë ambasador në bazë të kësaj konvente.
Mesa kuptova sot nga një artikull tjetër e një prestigjioze angleze, zoti Ferizi e ka dorëzuar nënshtetësinë e Britanisë së Madhe para disa kohësh dhe në këtë aspekt zbatohet edhe Konventa e Vienës pas asnjë problem.
Por ajo që më bren më tepër është fakti që zoti Ferizi ka shkuar atje ilegalisht dhe ky nuk është një mesazh i mirë për Britaninë e Madhe.”
