Një plagosje me thikë në rrethana misterioze ka ndodhur në Itali, ku të përfshirë janë edhe dy shtetas shqiptarë.
Ka qënë një 47-vjeçar italian, ai i cili fillimisht është paraqitur në spital i plagosur me thikë disa herë dhe në gjendje të rëndë shëndetësore. Raportohet se ai është lënë te dera e spitalit nga dy miqtë e tij me origjinë shqiptare, njëri prej të cilëve gjithashtu ishte plagosur por jo në rrezik për jetën.
47-vjeçari i plagosur është shtetasi me iniciale E.C, i cili është i njohur për autoritetet e drejtësisë italiane, për një vrasje të ndodhur në vitin 2016. Gjendja e tij paraqitet e rënduar, ndërsa ende nuk dihet se si ndodhi ngjarja apo lidhjet që kishte me dy shqiptarët.
Hetimet për ngjarjen
Hetuesit kanë marrë në pyetje dy miqtë e 47-vjeçarit me kombësi shqiptare, të cilët e dërguan në spital për ndihmë, dhe dyshohet se janë përfshirë në ngjarje.
Karabinierët, përveçse morën në pyetje dy shqiptarët për të rindërtuar atë që ndodhi, aktivizuan postblloqe në zonë, me shpresën për të kapur sulmuesin e shtetasit E.C. ose për të identifikuar bashkëpunëtorët e tij, por ende nuk ka asnjë gjurmë nga pjesëmarrësit në sulmin që degjeneroi në tentativë vrasjeje.
Për sa i përket motivit, hetuesit dyshojnë më shumë se ngjarja mund të ketë ndodhur për larje hesapesh në fushën e trafikut të drogës. Shqiptarët janë parë me njolla gjaku në rroba, duar, dhe mavijosje në trup, çfarë i shton dyshimet se mund të jenë konfliktuar me të plagosurin para ngjarjes. Raportohet se të dy janë emra të njohur për policinë, por identiteti i tyre ende nuk bëhet me dije.
E shkuara e 47-vjeçarit të plagosur
I plagosuri që aktualisht ndodhet mes jetës dhe vdekjes në spitalin Castelli, nga ana tjetër ka një të shkuar të errët, shkruajnë mediat e huaja. Në gusht 2016, ai u akuzua si autor i përplasjes për vdekje të një 58-vjeçari, Giovanni Palazzolo, punonjës i një kompanie bujqësore dhe baba i dy fëmijëve. Ai u vra në Ardea, teksa ishte në bordin e makinës së tij Fiat Panda, u godit nga makina që drejtohej nga tridhjetë e nëntë vjeçari në atë kohë.
Mbetet ende mister rrethanat e ngjarjes. Autoritetet vijojnë hetimet për zbardhjen e plotë të rastit.
