Është ekstraduar nga Shtetet e Bashkuara të Amerikës në Shqipëri,n ë kuadër të operacionit të koduar “Return”, shtetasi Albert Shkembi, 60 vjeç. Ky i fundit është dënuar me 12 vjet burgim nga drejtësia shqiptare, për veprimtari kriminale në fushën e narkotikëve.
Autoritetet policore raportojnë se lokalizimi dhe kapja e këtij shtetasi, në New Jersey, në muajin qershor të këtij viti, është bërë e mundur pas shkëmbimit të vazhdueshëm të informacioneve ndërmjet Policisë së Shtetit, DSS/OCIU pranë Ambasadës së Shteteve të Bashkuara Tiranë dhe Shërbimit të Marshallëve Amerikanë.
Albert Shkembi ishte shpallur në kërkim ndërkombëtar, pasi Gjykata e Apelit Tiranë, me vendimin e datës 22.11.2016, e ka dënuar me 12 vjet burgim, për veprën penale “Trafikimi i narkotikëve”, mbetur në tentativë, kryer në bashkëpunim.
Gjatë periudhës 2014-2015, ky shtetas, në rolin e organizatorit dhe financuesit, në bashkëpunim me shtetas të tjerë, ka organizuar trafikimin dhe transportimin e lëndëve narkotike kokainë dhe heroinë, nga Turqia drejt Shqipërisë (me itinerar Turqi-Greqi-Maqedoni-Shqipëri), për t’i shitur këto lëndë në tregun e brendshëm, si dhe për t’i trafikuar më pas drejt vendeve të tjera të BE-së.
Policia e Shtetit ka publikuar dhe pamjet e momentit kur Albert Shkëmbi mbërri në aeroportin e Rinasit.
