Në redaksinë e emisionit “Stop” është drejtuar Robert Çaushi, i cili për shkak të një huaje u bë përfitues i tre apartameneve dhe 2 garazheve në qytetin e Vlorës. Sot ai ka një problem me firmën ndërtuese. Në vitin 2005 Roberti i dha 200 mijë euro Berti Kushit, administratorit të firmës Ormars 2000 shpk.
Për shkak të moslikuidimit të kësaj shume, në vitin 2012 firmosi një kontratë sipërmarrje për tre apartamente dhe dy garazhe në Vlorë. Pasi Berti Kushi ndërroi jetë, përgjegjësinë e shoqërisë e mori e shoqja, Marigo Kushi e cila në vitin 2020 mori një leje të re ndërtimi.
Duke qenë se kontrata e sipërmarrjes është më një leje të vjetër ndërtimi, qytetari kërkon të firmosë një aneks të kësaj kontrate ose kontratë të re në mënyrë që të jetë i sigurtë që ato apartamente nuk do të shiten apo tjetërsohen.
Qytetari thotë se drejtuesja e firmës nuk i firmos asnjë dokument dhe me atë kontratë që ka nuk bën dot asnjë veprim në kadastër.
Robert Çaushi: Ça do bëjmë për atë kontratën, do ta mbarojmë apo si do bëjmë se u bë kaq kohë që shtyhemi dhe nuk po zgjidhim gjë, të lutem?
Marigo Kushi: Nuk…nuk…Unë për respekt, hajde të takoj, por nuk kam pse ta ndryshoj kontratën. Kontrata do qëndrojë ashtu siç është, sepse të gjithë klientët i kanë kontratat dhe nuk i kanë prekur. Në momentin që mbaron objekti unë do bëj gati edhe hipotekimin e objektit, kështu që nuk kam pse ta lëviz kontratën fare.
Robert Çaushi: Po mirë e bëjmë me shpenzimet e mia, unë nuk e regjistroj dot këtë kontratë.
Marigo Kushi: Jo, jo! Nuk e bëj, sepse me asnjë klient nuk e bëj sepse me këto çmime që kanë vajtur sot në stratosferë unë s’vete dot tek noterja t’i tregoj atë çmim që e keni marrë juve.
Robert Çaushi: Po nuk ka lidhje, unë duhet ta regjistroj këtë pronë sepse e kam timen, unë kështu e presupozoj që…
Marigo Kushi: Do ta regjistrosh mbasi të dali hipoteka! Unë do bëj hipotekën.
Robert Çaushi: Po ku e di unë që ti nuk m’i shet këto prona se u bë kaq kohë që ti m’i shtyn…
Marigo Kushi: Absolutisht! Absolutisht! Nuk i shes! Absolutisht, nuk bëj ato veprime!
Robert Çaushi: Po mirë i ka mbaruar leja sepse është me lejen e vjetër.
Marigo Kushi: Jo, jo, të rrish i qetë. Sido që i kam hallet, jo me ty, por me asnjë klientelë që mua më ngelën në rrugë të madhe, nuk i prek kontratat.
Robert Çaushi: Po kam vajtur mbi 70-80 herë në Vlorë për ta regjistruar në ASHK dhe nuk arrij dot ta regjistroj mi motër.
Marigo Kushi: Nuk regjistrohet, se janë me lejet e vjetra.
Robert Çaushi: Po pikërisht pra, kjo është edhe ngërçi.
Marigo Kushi: Të rrish i qetë, Berti!
Robert Çaushi: Po si të rri i qetë? Po ça të kushton ty të bësh një kontratë aneks ose një amendim të kontratës?
Marigo Kushi: Nuk bëj dot shtesa kontrate. As me ty, as me një klient.
Robert Çaushi: Po më the që do ta bëj o Marigo, më the do flas me avokatin…
Marigo Kushi: Jo, jo! Nuk e bëj.
Fatmir Lecaj, ekspert i problemeve me noterinë, shpjegon se nëse leja është zgjatim kontrata e vjetër duhet të regjistrohet në kadastër, por edhe në këtë rast ka nevojë për një deklaratë noteriale të firmosur mes palëve. Nëse leja është e re, është detyrim, që të shkruhen në kontratë afatet e reja.
