Kreu i SPAK Altin Dumani tha këtë të mërkurë gjatë një aktiviteti se presioni mediatik dhe retorika politike kundër SPAK nuk ka asnjë ndikim në punën e prokurorëve të institucionit që ai drejton.
“Presioni mediatik dhe retorika politike nuk ka asnjë lloj ndikimi. Jam imun ndaj të dyjave. Këtë përpiqem t’ua përcjellë edhe trupës se prokurorëve. Jemi të vëmendshëm kur evidentohen problematika nga media apo politika në diskutime të ndryshme, sigurisht që ne i ndjekim. Por në raport me hetimet nuk na ndikojnë”, tha Dumani.
Gjatë fjalës së tij, tha se çështjet korruptive dhe shkeljet e barazisë në tendera, apo edhe shpërdorimi i detyrës kërkojnë kohë për t’u hetuar, pasi përdoren dhe teknika speciale.
Ai pranoi se ka dhe zvarritje të hetimeve për shkak të numrit të lartë të të pandehurve që mund të ketë një çështje.
“SPAK është përpjekur të ndërtojë një marrëdhënie të mirë me shoqërinë civile dhe do të vazhdojmë të jemi bashkëpunues. Shumica e çështjeve të SPAK kërkojnë afate të gjatë, ka shtyrje të seancave dhe zvarritje të hetimit. Çështjet me 20 të pandehur krijojnë shtyrje. Sidomos çështjet me natyrë korruptive dhe shkelje të barazisë në tendera, apo edhe shpërdorimi i detyrës kërkojnë kohë shumë të gjatë por edhe teknika speciale. Nuk krahasohet një çështje e SPAK me një çështje të prokurorive të juridiksionit të përgjithshëm. Sa i takon transparencës ne jemi përpjekur aq sa ligji na lejon të jemi transparent me publikun dhe të gjitha i kemi publikuar në faqen e SPAK. Ka njoftime të rralla kur interesi publik është shumë i madh dhe ne kemi reaguar”, tha Dumani.
