Detaje të tjera kanë dalë në dritë nga ngjarja e rëndë në burgun e Peqinit dhe siguria në këtë institucion të vuajtjes së dënimit.
A2 CNN ka siguruar një dokument, ku më 30 nëntor, vetëm dy javë para ngjarjes së rëndë në burg, drejtori i komanduar Kamber Hoxha, ka informuar Drejtorinë e Përgjithshme të Burgjeve, Admir Abrija për problematika të theksuara sigurie brenda burg.
Në këtë dokument theksohet se të dënuarit kanë privatizuar ambientet, duke investuar në dhoma, situatë e cila ka bërë thuajse të pamundur kontrollin e tyre. Më tej, theksohet se ambientet e përbashkëta janë shndërruar si palestra private, ndërsa disa të burgosur i përdorin të dënuarit e tjerë për transport ushqimesh, plaçkash apo dhe për tu pastruar qelitë.
Po ashtu, në këtë dokument përmendet se skaneri nuk ka punuar që prej datës 21 tetor, ndërsa sistemi i kamerave kishte probleme të theksuara.
Në dokument theksohet se këto janë vetëm disa prej problematikave të hasura gjatë rivendosjes së situatës në burgun e Peqinit nga drejtori i komanduar Kamber Hoxha, ndërsa thuhet se në vijim do të ketë një informacion më të detajuar me të gjitha problematikat.
Ndërkohë, më 1 dhjetor, edhe Nikolin Gjonpalaj, me detyrë shef i policisë së burgut të Peqinit, i ka dërguar një dokument me problematikat e hasura brenda ambienteve të burgut drejtorit të përgjithshëm të burgjeve, Paulin Rajta, drejtor i përgjithshëm i policisë së burgjeve. Në këtë dokument evidentohet fakti që policët e burgjeve kanë hasur shumë kundërshtime, rezistencë aktive, si dhe kërcënime nga të burgosurit.
Pavarësisht këtyre dokumenteve, skaneri dhe siguria në burgun e Peqinit nuk është rregulluar, ndërsa më 15 dhjetor Arben Lleshi, i dënuar përjetë, u ekzekutua me pistoletë nga Mjacaj, ndërsa Indrit Shaqja mbeti i plagosur.
Pas ngjarjes, drejtori i burgut Kamber Hoxha dhe 11 zyrtarë të tjerë, mes të cilëve edhe ish-shefi i policisë së burgut, Nikolin Gjonpalaj, u ndaluan dhe ndaj tyre është dhënë masa e sigurisë arrest me burg, ndërsa ngjarja e rëndë ende nuk është zbardhur.
