I konsideruar si pronari “de fakto” i inceneratorëve, Mirel Mërtiri ka thyer heshtjen dhe ka dalë sot për herë të parë në një intervistë televizive për të mbrojtur veten e tij në mega aferën qindra milionëshe euro.
Gjatë intervistës në Syri TV, ai është pyetur nga Belind Këlliçi se pse nuk është paraqitur në Komisionin Hetimor të inceneratorëve, ku ai ishte thirrur si dëshmimtar për të dhënë versionin e tij.
Por, Mirel Mërtiri deklaroi se nuk ka patur asnjë kërkesë për të për t’u paraqitur në Komisionin Hetimor. Pas kësaj deklarate, Këlliçi nxori në emisionin listën e dëshmimtarëve të thirrur në Komisionin Hetimor të inceneratorëve të firmosur nga kretarja e komisionit Jorida Tabaku, mes emrave ishte dhe ai i Mirel Mërtirit.
Gjithsesi, pavarësisht atij dokumenti, Mirel Mërtiri këmbënguli se pavarësisht se e ka emrin në atë listë, në adresë të tij nuk ka mbërritur as edhe një ftesë për t’u paraqitur në Komisionin Hetimor.
Në këtë rast ka vetëm dy versione; ose gënjen Mirel Mërtiri ose atëherë nuk ka vepruar Kuvendi për t’i dorëzuar kërkesën për t’u paraqitur në Komisionin Hetimor.
