Është hedhur shorti për fazën e 1/16-ave të Champions League, ku goglat vënë përballë Interit skuadrën e Atletico Madrid.
Një duel mjaft i luftuar pritet të jetë mes dy ekipeve që kërkojnë të vazhdojnë me rrugëtimin në këtë kompeticion. Pas hedhjes së shortit ka reaguar zyrtari i Interit, Javier Zanetti.
Ky i fundit ka theksuar se është një ndeshej e vështirë, por Interi nuk ka frikë asnjë kundërshtarë dhe synon finalen e madhe.
“Atletico Madrid? Është një ekip i vështirë për t’u përballur, unë e njoh shumë mirë Simeonen, jemi shokë. Do të jenë dy ndeshje të mira mes dy skuadrave të mëdha.
Pasi e mbyllëm të dytët në grupe e dinim se mund të ishte shumë e ndërlikuar. Respekt i madh për Atleticon, e njoh kulturën dhe historinë e tij. Ata sigurisht do të jenë një kundërshtar i vështirë për t’u mposhtur, por edhe ne jemi në gjendje të luajmë dy ndeshje të shkëlqyera. Ne do të jemi gati.
Disavantazh të luash ndeshjen e parë në shtëpi? Është e njëjta gjë. Do të jenë dy ndeshje shumë të komplikuara, duhet të fillojmë mirë dhe nëse bëjmë mirë në “San Siro”, atëherë duhet të bëjmë të njëjtën gjë edhe në Madrid. Do të jenë dy ndeshje shumë të balancuara, të dyja skuadrat kanë lojtarë të mrekullueshëm. Shpresojmë që në atë moment forma e Interit të jetë e njëjtë si sot, por ka ende kohë”, ka përfunduar Zanetti.
