Komisioni i Prokurimit Publik ka rrëzuar sërish vendimmarrjen e Komisionit të Vlerësimit të Ofertave të kompanisë ECO Elb që ka nën administrim inceneratorin e Elbasanit duke kërkuar anulim të procedurës.
Në një vendim të zbardhur këto ditë KPP i ka dhënë të drejtë ankimimit të Qendrës së Monitorimit të Mjedisit sh.p.k sa i takon procedurës “Monitorimi i parametrave mjedisorë dhe hartimi i raporteve mjedisore (për landfillin) me një fond limit 3 milionë lekë.
Në vendim KPP ka kërkuar sërish rishpalljen e procedurës nga e para ku të reflektohen kërkesat që janë bërë nga komisioni. Duke u ndalur në disa pika të ankimimit KPP ka dalë në përfundimin se dokumentet e tenderit janë hartuar në kundërshtim me kërkesat e ligjit në fuqi për prokurimet publike.
“Komisioni i Prokurimit Publik gjykon, se autoriteti kontraktor ka hartuar dokumentet e tenderit të mësipërm në kundërshtim me dispozitat ligjore në fuqi për prokurimin publik.
Komisioni i Prokurimit Publik thekson, se kriteret e veçanta për kualifikim, specifikimet teknike nga autoriteti kontraktor duhet të përcaktohen të qarta, të sakta dhe në përputhje me legjislacionin në fuqi, me qëllim që të kryhet një vlerësim i drejtë dhe jodiskriminues, duke mos penguar pjesëmarrjen në një procedurë prokurimi, si dhe t’i japin mundësi ofertuesve të përcaktojnë objektin e kontratës” thuhet në dokument.
Po kështu Komisioni i Prokurimit Publik gjykon, se mospërputhja e krijuar midis kërkesave të parashikuara nga autoriteti kontraktor në shtojcën 5 “Specifikime teknike”, si dhe përcaktimet e bëra në Urdhrin nr. 126, datë 10.06.2022 të Agjencisë Kombëtare të Mjedisit, “Për procedurën e dorëzimit/pranimit të dokumenteve dhe raporteve të vetëmonitorimit, për subjektet e pajisura me leje mjedisi të tipit A ose B”, ndikon drejtpërdrejtë në hartimin e ofertës ekonomike të operatorëve ekonomikë të interesuar, si dhe në vlerësimin e ofertave nga ana e KVO-së, si dhe është haptazi jo në përputhje me legjislacionin për prokurimin publik, ndaj përbën shkak për anulimin e procedurës së prokurimit, me qëllim trajtimin e barabartë dhe jodiskriminues për të gjithë operatorët ekonomikë. Në finale duket se kjo është edhe arsyeja pse është kërkuar anulim i procedurës.
Tenderi shfaqi probleme dhe në fazën e parë
Eco Elb njoftoi dy procedura në sistemin e Agjencisë së Prokurimit Publik të cilat pasi kaluan disa hallka dhe u ankimuan në KPP u rikthyen nga ky i fundit për rishpallje duke argumentuar se ECO Elb nuk kishte respektuar detyrimet që lidheshin me respektimin e hallkave të ankimimit.
Një operator i cili kishte qenë pjesëmarrës në procedurë ankimoi pranë KPP s’kualifikimin nga gara duke e cilësuar atë të padrejtë dhe do të ishte vetë KPP që do t’i jepte pjesërisht të drejtë këtij ankimimi.
Në vijim KPP do të kërkonte hetim të procedurës nga Agjencia e Prokurimit Publik si dhe marrjen e masave nga ana e ECO ELB që të bënte rishpalljen të procedurës duke reflektuar ndryshimet e rekomanduara.
Në shtator Eco Elb do të rishpallte sërish procedurat ku njëra prej tyre ka përfunduar sërish në KPP dhe ky i fundit i ka dhënë të drejtë ankimuesit duke kërkuar nga kompania shpalljen nga e para të procedurës.
Eco Elb është kompani e krijuar në 18.11.2021 dhe ka në objekt të aktivitetit “Grumbullimi, rehabilitimi dhe përpunimi i mbetjeve të ndryshme, organike, të ngurta, të gjelbërta,..etj, në territorin administrativ të të gjithë bashkive të Qarkut Elbasan. Trajtimi i mbetjeve me djegie (incenerator).
Prodhimi dhe shitja e energjisë elektrike. Aktivitete të tjera në fushën e përpunimit të mbetjeve, që lejon ligji, për interesat e shoqërisë dhe të komunitetit. Aksionerë të saj janë Bashkia Cërrik me 8 për qind, Gramsh me 8 për qind. Elbasan 52 për qind, Peqin 8 për qind, Belsh 8 për qind, Librazhd 8 për qind./Monitor
