Autoriteti Kombëtar i Ushqimit ka ndëshkuar me gjobë dy subjekte në Tiranë dhe Fier për ushqim të pasigurt dhe mangësi në etiketim.
Gjatë njoftimit, AKU bën me dije se një magazinë ushqimore në Fier shpërndante në treg produkte të skaduara dhe për këtë arsye ky subjekt u gjobit dhe mallrat u asgjësuan.
“Drejtoritë Rajonale të AKU-së në Tiranë dhe Fier gjatë ushtrimit të kontrolleve, kanë konstatuar shkelje të kërkesave ligjore në dy subjekte me aktivitet “supermarket” dhe “magazinë ushqimore”.
Konkretisht gjatë ushtrimit të kontrollit në një subjektet me aktivitet “supermarket”, Tiranë, është konstatuar mungesë e etiketimit në gjuhën shqipe të disa produkteve ushqimore. Për këtë arsye trupa inspektuese ka gjobitur subjektin në vlerën e 50,000 lekëve, si dhe ka bllokuar një sasi produktesh ushqimore deri në etiketimin e tyre konform ligjit.
Në Fier gjatë ushtrimit të kontrollit në një “magazinë ushqimore”, ka rezultuar se subjekti shpërndante produkte ushqimore të pasigurta për konsum, si dhe një sistem gjurmueshmërie të pjesshëm. Për këto shkelje ndaj subjektit u vendos masa administrative në vlerën e 400’000 lekëve, si dhe u bllokua sasia prej 38 kg produkte ushqimore me destinacion asgjësimin e tyre”, njofton AKU.
