Një vilë tre katëshe është përfshirë nga zjarri pas mesnatës së kaluar në lagjen “30-Vjetori” në Berat. Mësohet se vila është në pronësi të shtetasit Dritan Qato, i cili jeton prej vitesh në Itali bashku me familjen, ndërkohë që në banesë jeton i vetëm babai i tij, Shahin Qato,78-vjeç.
Fatmirësisht, zjarrfikësit kanë bërë të mundur vënien nën kontroll të flakëve dhe fikja e zjarrit, ndërkohë që është nxjerrë pa lëndime nga banesa dhe i moshuari.
Shefi i Repartit të Shërbimit Zjarrfikës Berat, Artan Merko ka konfirmuar se zjarri dyshohet se ka qenë i qëllimshem, pasi kati i tretë i vilës ishte spërkatur me benzinë dhe kishte shpërthyer në flakë. Zjarri kishte marrë përmasa të mëdha për shkak dhe të konstruksionit të banesës prej dërrase.
Policia po heton për të zbardhur ngjarjen dhe identifikimin e autorit/autorëve, teksa po kontrollohen edhe kamerat e mundshme të shtëpive e bizneseve përreth vilës. Nuk përjashtohet as pista që me benzinë ta ketë spërkatur edhe vetë i moshuari, pasi dyshohet se vuan nga skleroza.