Chelsea po zhgënjen këtë sezon në Premier League. “Blutë” e Londrës nuk po ia dalin dot të sigurojnë rezultate pozitive, teksa e shikojnë vetën në vendin e 12-të me 19 pikë.
Duket se humbja ndaj Everton me shifrat 2-0 nuk është “kapërdijë” lehtë nga legjenda e londinezve, John Obi Mikel, i cili nuk kurse Armando Brojën. Sulmuesi shqiptar ishte titullar në këtë sfidë, por nuk mundi të linte asnjë gjurmë.
“Broja nuk më duket në nivelin e Chelseat. Shpresoj që klubi të transferojë Osimhen pasi është lojtari që mund t’i sigurojë objektivat e Chelseat. Gallagher është lojtar i mirë, por jo për Chelsean. Nuk do të kishte shanse të ishte pjesë e titullarëve të skuadrës në kohën time”, u shpreh Mikel.
John Obi Mikel qëndroi te Chelsea për 11 vite duke kompletuar 372 paraqitje me “Blutë”, ndërsa fitoi 10 trofe duke përfshirë dy herë Premier League dhe një herë Champions League.
