Julian Ahmataj kërkon nga skuadra zgjuarsi dhe fitore në sfidën me Laçin. Trajneri i Tiranës është kënaqur përgjysmë për sfidën që skuadra e tij luajti në kampionat me Partizanin.
Në intervistën para ndeshjes me kurbinasit, për “Panorama Sport”, trajneri pranoi se Tirana synon titullin kampion edhe këtë sezon, teksa aktualisht renditen në vendin e 3-të me 22 pikë.
Pritshmëritë janë të mëdha, grupi është mjaft i mirë, me edicionin që gjendet në javën e 16-të.
Ahmataj foli për barazimin në derbi, për problemet që ka hasur ekipi deri tani dhe natyrisht për ecurinë në të ardhmen.
Nëntë ndeshje ka Julian Ahmataj në krye të Tiranës. Trajneri i bardhebluve ka grumbulluar 12 pikë në këto nëntë takime me një mesatare 1.33 pikë për ndeshje.
Do të luani sfidën e radhës me Laçin, një takim goxha i sikletshëm edhe për faktin që jeni mundur ndeshjen e parë?
Kundërshtari është i vështirë. Ka shpirt gare dhe lufton shumë. Ne duhet t’i përgjigjemi me të njëjtën monedhë që të dalim triumfues.
Ju ngroh sadopak fakti që në derbi luajtët mirë?
Unë e kam thënë edhe herë të tjera, që gjërat prishen me sekonda, prandaj ne nuk duhet të ulim marrshin dhe të rritemi. Nuk duhet të ulim përqendrimin, përkushtimin, sakrificën dhe luftën e fortë sportive. Këto janë ato fakte që i mbajnë parametrat e çdo lojtari në nivel të lartë.
Pas oshilacioneve, e shihni skuadrën të uritur për fitore?
Po, shumë të uritur për fitore. Tani kemi ardhur në pikun e kampionatit dhe ne duhet që pa diskutim të tregojmë aftësitë tona dhe cilësitë si skuadër.
Keni shqetësime?
Kemi. Patrik, që dihet, nuk është këtë sfidë. Filipi ka pasur një problem dje, ndërsa Përgjoni mungon për efekt kartonësh. Qefalija dihet që mungon prej kohësh. Ama kemi shumë forca dhe mundësi apo lojtarë që të përballojnë ndeshjen dhe të japin kontributin maksimal për të arritur maksimalen.
Ju e thatë që ADN-ja e Tiranës është titulli. Kjo skuadër ka mundësi që të fitojë dy trofetë?
Një gjë është e sigurt. Ky ekip ka cilësi dhe ka mundësi për të fituar. Ne nuk do të heqim dorë nga mundësitë, deri në maksimumin tonë.
Duke iu kthyer derbit, çfarë do t’i hiqnit asaj ndeshje që të fitonit?
Duhet të ishim treguar shumë të zgjuar. Kishte momente që kundërshtarët mund të ndëshkoheshin me karton të verdhë. Mund të kishim qenë më altruistë dhe të mbyllnim rezultatin. Në futboll, sulmuesit e kanë gjenetike goditjen e portës dhe nuk mund të tërhiqen pas.
