Partizani është padyshim një nga klubet me financat më të shëndetshme në raport me konkurrencën në Superligë dhe që nga 2013-ta kur është kthyer në Superiore, ka provuar të transferojë lojtarë të rëndësishëm, që kanë luajtur me Kombëtaren apo kanë pasur një karrierë të madhe me klubet.
I pari ishte afrimi i Egdar Çanit në vitin 2017, për të vijuar me Ferhan Hasanin dhe Ergys Kaçen në 2021-shin. Pas një tërheqjeje 2-vjeçare, të kuqtë vendosën të afronin Grezdën, një lojtar me karrierë ndoshta edhe më të madhe, por që sërish pati fatin e të tjerëve para tij.
Për arsye të ndryshme asnjë prej “yjeve” që Partizani ka afruar, nuk ka arritur të shkëlqejë me fanellën e kuqe.
Problemi mund të qëndrojë në faktin që lojtarët afrohen në skuadër pasi futbollistët e kanë kaluar kulmin e tyre ose përshtatja në Superligë mund të jetë një proces i vështirë për arsye të caktuara.
