Kolektivi për Mendim dhe Veprim Feminist, do të zhvillojë këtë të martë protestë gjithëpopullore me moton “nuk ka paqe pa sigurinë e grave”, pas vrasjes së Liridona Murselit javën e kaluar nga bashkëshorti i saj Naim Murseli.
Protesta nis në orën 18:00, në sheshin “Zahir Pajaziti”, në Prishtinë.
“Thërrasim në organizim dhe veprim të gjitha/ë anembanë Kosovës që të mblidhemi dhe të themi njëzëri që nuk ka paqe pa sigurinë e grave dhe të kërkojmë që dhuna e gjinizuar dhe femicidi të trajtohen si urgjencë kombëtare”, thuhet në njoftim.
Kujtojmë se 30-vjeçarja u vra më 29 nëntor në rrugën “Dalip Alshiqi” në Prishtinë në një komplot të organizuar nga burri i saj, Naim Murseli, së bashku me vrasësin Granit Plava dhe Kushtrim Kokallan, pjesëtar i FSK-së. Janë ende të paqarta arsyet e vrasjes së Liridonës ndërsa hetimet vijojnë ende.
