Sali Berisha iu rikthye procedurës me të cilën botuesi Karlo Bolino ka përfituar një sipërfaqe toke në kryeqytet me qera simbolike përmes disa vendimeve qeverie, ku më pas ka ngritur redaksitë e mediave të tij.
Në një konferencë nga selia blu, kreu i PD publikoi dy dokumente: një shkresë nga Agjencia e Prokurimit Publik që përcakton vlerën e pronës në rast të dhënies me qera për 20 vite dhe një leje ndërtimi të firmosur nga Edi Rama si kryetar i Këshillit Kombëtar të Rregullimit të Territorit.
Për dokumentin e parë, Berisha llogariti se nëse prona që ka përfituar Bolino do të jepej me qira për të njëjtën periudhë që i është dhënë botuesit, atëherë buxheti do të arkëtonte 1.4 milionë euro për 20 vite. Por, shtoi ai, Bolino e përfitoi me një qira simbolike.
Për shkresën e dytë që lidhet me miratimin e lejes së ndërtimit, tha se është “unike në botë” duke qenë se siç u shpreh, është firmosur nga vetë Rama si kreu i qeverisë duke anashkaluar bashkinë. Dhe kjo, sipas tij, përben një “dëshmi të përqendrimit të të gjithë pushtetit të tij për të vjedhur dhe grabitur”.
Kryedemokrati solli në vëmendje se sipas planit rregullator të bashkisë për vitin 2013, toka ishte përcaktuar për tu ndërtuar shkollë. Më herët, ka deklaruar se toka 4 900 metra katrorë i ishte falur bashkisë nga pronarët për të ndërtuar një shkollë për shkak të mungesës në zonë.
Toka në fjalë i kaluar më pas Ministrisë së Financave dhe më tej mes këtij institucioni dhe kompanisë “MTSC” të Karo Bolinos është lidhur kontrata e qirasë simbolike për dy dekada. Qëllimi fundor, ka denoncuar më herët Berisha, është që duke shfrytëzuar ligjin, Bolino të bëhet më pas pronar i tokës që kryedemokrati e quan “të grabitur” me vendim qeverie.
“Qiraja e pronës 1.4 milionë euro për 20 vite, Bolino e mori falas”
Duke shpjeguar dokumentin e parë të paraqitur, Berisha tha: “Desha të paraqes para jush këtë dokument të veçantë. Çfarë tregon? Ky dokument se në buletinin numër 29 me datë 22.07.209, Agjencia e Prokurimit Publik dhe Ministria e Financave publikojnë njoftimin për dhënie me qira të pasurisë 7/649 me sipërfaqe të përgjithshme 4021 metra katrorë. Ishte e para kjo, pasi shtoi 800 e ca metra këtu Rama. Me vendimin e dytë, Rama shton 800 e ca metra. Pra, dhënien me qira, e cila thotë se vlera dysheme për detyrimin e qirasë për fillimin e konkurrimit është 631 mijë lekë në muaj. Se ishin tre ndërtesa”.
Më tej, bëri një përllogaritje të kostos për 20 vite, e njëjta periudhë për të cilën botuesi Bolino ka përfituar pronën me vendim qeverie.
“Nëse i mblidhni për një vit, bëjnë 74 mijë euro në vit. Në 20 vite, bëjnë 1 milion e 400 mijë euro. Pra, vetëm sikur me qira të jepej, nga ky territor, qytetarët e Tiranës fitonin 1.4 milionë euro. Çfarë ndodh? Me deus ex machina, kalohet nga 63 mijë euro qiraje, Denaj me Ramën e kalojnë në 1 euro. Dy muaj mbrapa bëjnë vendimin dhe zonën e marrin bashkë me Bolinon me 1 euro. Pastaj ndryshojnë edhe kontratën dhe e shtojnë edhe me 800 metër katrorë. Me të tretën, vendosin fshirjen e objekteve”, tha Berisha.
Berisha: Rama firmosi vetë lejen e ndërtimit për godinën 3-katëshe të Bolinos, kjo nuk ndodh as në diktaturë
Kryedemokrati shpjegoi se për të ndërtuar në tokën e përcaktuar për shkollë, ku u ngit redaksia e mediave të Bolinos, leja është firmosur nga Edi Rama si kreu i Këshillit të Ministrave.
“Leja e ndërtimit e Edi Ramës për Karlo Bolinon është unike në botë. Nuk ka kryeministër në botë, që të firmosë në detyrë, një leje ndërtimi për një ndërtesë trekatëshe. Është unike. Është unike! Është dëshmi e përqendrimit të të gjithë pushtetit të tij për të vjedhur dhe grabitur. Pse e ka firmosur vetë? Sepse ka pasur frikë se këshilli do bëjë zhurmë të madhe kur të mësojë se po grabit tokën e shkollës. Nuk ndodh, nuk gjen në të gjithë diktaturën komuniste në Shqipëri, një leje ndërtimi e firmosur nga Mehmet Shehu, apo nga pasardhësi i tij”, tha Berisha
“Kjo ndodh vetëm në një vend ku një njeri, që për t’u pasuruar vetë, është i gatshëm të ushtrojë çdo lloj pushteti, vetëm për të vjedhur. A ka dëshmi më flagrante se kjo leje, për një ndërtesë trekatëshe, e firmosur nga kryeministri, jashtë çdo lloj kodi dhe ligji. Natyrisht jo vetëm nga kryeministri, se pjesa tjetër është nga Anila Denaj, leja për të ndërtuar në territorin e vjedhur. Ky është dokumenti, i cili dëshmon edhe njëherë në mënyrën më flagrante, aktin skandaloz të rrëmbimit të 4900 metra tokë, të cilën pronarët e lanë vakëf për ndërtimin e shkollës së mesme në territorin ku nuk kishte një të tillë”, shtoi ai.
Kallëzim në Prokurorinë e Posaçme? Berisha: SPAK i kapur nga Rama
Kryetari i PD paralajmëroi se në vijim do të bëjë publike të tjera shkresa, që sipas tij “faktojnë veprat penale që kanë kryer Rama dhe Bolino në këtë vjedhje skandaloze e të pashembullt”.
I pyetur se nëse do bëjë denoncim në SPAK për rastin, Berisha u përgjigj se “të dërgosh doje në SPAK për Edi Ramën do të thotë të tallesh me ligjin dhe veten”. Kjo pasi sipas tij, kjo prokurori është e kapur nga vetë kryeministri.
Vetë Bolino ka mohuar akuzat. Në një artikull të publikuar më herët prej tij, shkruan se procedura e ndjekur për të marrë me qera simbolik truallin është “plotësisht ligjore”.
