Pa fitues u mbyll derbi i 172-të i kryeqytetit mes Tiranës dhe Partizanit. Takimi u luajt në “Air Albania”, në kuadër të javës së 15-të të Superiores.
Pjesa e parë foli në favor të bardhebluve që krijuan më shumë dhe dominuan lojën, ndërsa golin e gjetën në minutën e 28’ me Hasanin.
Me një goditje nga brenda zone, duke shfrytëzuar një ribaund pas një krosimi nga e djathta, sulmuesi i Tiranës gjeti rrugën e rrjetës duke mundur portierin kundërshtar.
Me këtë rezultat u mbyll pjesa e parë.
Në të dytën, Tirana u mundua të administrojë avantazhin, megjithatë rastet nga të dyja ekipet nuk munguan. Më i favorshmi ishte ai i Latifit që me portën gati të boshatisur nuk arriti të dyfishojë avantazhin.
Rrjetën e gjeti në minutën e 79’ për Partizanin Keko i futur nga stoli. Ai u tregua i saktë me një goditje nga brenda zone, duke shfrytëzuar ‘braktisjen’ nga mbrojtja e Tiranës.
Minutat e mbetura nuk sollën rrjeta të tjera dhe takimi u mbyll në barazim 1-1.
Me këtë rezultat, Partizani ruan në shtatë pikë diferencën mes skuadrave, me të kuqtë në vendin e dytë dhe bardheblutë në të tretin.
Në krye të kampionatit është Egnatia me 35 pikë. Megjithatë, në mesjavë Partizani luan ndeshjen e prapambetur me Teutën e vendit të fundit. Në rast fitoreje, shkon -1 nga vendi i parë.
Gjatë takimit të sotëm, arbitri u detyrua ta ndalonte lojën në disa raste për shkak të hedhjes së flakadanëve dhe sendeve të forta në fushën e lojës nga të dyja tifozëritë.
