Kreu i burgut të Fushë-Krujës, Durim Toska është vënë në pranga me akuzën e dhunës në familje dhe armëmbajtjes pa leje.
Përmes një njoftimi të policisë së Pogradecit bëhet me dije se u arrestua në flagranë Durim Toska, banues në fshatin Piskupat, Pogradec, pasi dyshohet se ka ushtruar dhunë ndaj bashkëshortes së tij, e cila u pajis me urdhër mbrojtjeje.
Gjatë kontrollit të ushtruar në banesën e tij iu gjet një armë zjarri tip pistoletë me municion luftarak, të cilën 52-vjeçari e posedonte pa leje.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Arrestimi i Toskës u krye pasi ministria e Drejtësisë informoi për shkarkimin e tij nga posti i Drejtorit të Institucionit të Ekzekutimit të Veprave Penale në Fushë-Krujë.
