Karriera e shkurtër e republikanit të paditur George Santos në Dhomën e Përfaqësuesve të SHBA-së mori fund këtë të premte, kur kolegët e tij votuan për ta përjashtuar pas akuzave për korrupsion dhe mashtrim me paratë e fushatës.
Dhoma e Përfaqësuesve votoi 311-114 për të përjashtuar menjëherë Santos. Pak para votimit, Kryetari i Dhomës së Përfaqësuesve Mike Johnson tha se do të votonte kundër përjashtimit sipas Reuters.
Santos, 35 vjeç, është përfshirë në polemika që nga zgjedhjet në nëntor 2022. Ai ka pranuar se ka fabrikuar pjesë nga biografia e tij dhe prokurorët federalë e akuzojnë atë për pastrimin e fondeve të fushatës dhe mashtrimin e donatorëve.
Santos është deklaruar i pafajshëm për këto akuza.
Ai i mbijetoi një përpjekjeje të mëparshme dëbimi në fillim të nëntorit, kur 182 nga kolegët e tij republikanë dhe 31 demokratë votuan kundër largimit të tij me arsyetimin se çështja e tij penale duhet të zgjidhet fillimisht për të marrë më pas një vendim përfundimtar.
Një hetim dypartiak i Kongresit muajin e kaluar zbuloi se ai shpenzoi pothuajse 4000 dollarë për trajtime spa, përfshirë Botox, nga llogaria e tij e fushatës në Kongres. Ai gjithashtu shpenzoi më shumë se 4,000 dollarë nga paratë e fushatës në dyqanin luksoz Hermes dhe bëri “blerje më të vogla” nga OnlyFans, një platformë në internet e njohur për përmbajtje seksuale.
