Janë zbardhur detaje të reja nga tritoli i shpërthyer tek dera e lokalit të 40-vjeçarit Armand Xhaferraj, ngjarje kjo e ndodhur në orët e para të mëngjesit të së martës së 28 nëntorit në rrugën “Sali Butka”, në Tiranë.
Xhaferraj e kishte marrë me qira atë lokal, teksa burime pranë grupit hetimor bëjnë me dije se kanë qenë dy persona që kanë vendosur rreth 100 gram tritol. Njëri prej tyre ka qëndruar në makinë, ndërsa tjetri ka vendosur tritolin në derën e lokalit dhe më pas janë larguar në drejtim të paditur.
Mësohet se është marrë në pyetje edhe roja i një biznesi tjetër që kishte në pronësi Armand Xhaferraj, (parkim dhe lavazh) përballë lokalit, por sipas grupit hetimor ai nuk ka mundur t’i identifikojë autorët.
Një nga pistat kryesore ku po heton grupi hetimor është ajo e një konflikti për pronën në vendin ku ndodhet lavazhi dhe parkimi i automjeteve. Kjo pronë sipas hetimeve rezulton se ka mbivendosje emrash të disa pronarëve.
Ndërkohë, pronari i lokalit Armand Xhaferraj ka dëshmuar se nuk ka dyshime se kush mund ti ketë vënë eksplozivin, duke mos dhënë më shumë detaje që mund t’i vinin në ndihmë grupit hetimor.
Fatmirësisht, si pasojë e shpërthimit, dëmet kanë qenë vetëm materiale.
