Janë zbardhur detaje të reja nga grabitja me armë e argjendarisë, pasditen e djeshme, rreth orës 17:15, në rrugën “Nënë Tereza” në Kamëz.
Burime pranë grupit hetimor bëjnë me dije se në grabitje janë përfshirë katër persona. Policia ka arritur që të sekuestrojë kamerat e sigurisë, ku duken qartë tre persona të armatosur me automatikë dhe të maskuar që dalin nga mjeti dhe futen brenda argjendarisë, ku arritën që të grabisin afro 500 gramë flori.
Personi i katërt kishte rolin e shoferit dhe ky i fundit ka qëndruar në mjet deri sa kanë dalë tre autorët nga biznesi dhe më pas janë larguar me mjetin tip “BMW”.
Autorët ishin me një automjet tip “BMW X6”, ngjyrë të bardhë, e cila nuk ka pasur targat e saj, por ato ishin kopjuar nga autorët dhe ia kanë ngjitur automjeti te tyre.
Fillimisht autorët knë ardhur nga Fushë-Kruja ndërsa janë larguar në drejtim të Laknasit. Një nga autorët, sipas dëshmisë së pronares, ka pasur dialekt jugor.
Policia po heton dhe po punon me zbërthimin e kamerave të tjera të sigurisë për të parë nëse ky grup kriminal është larguar drejt Fushë-Kruës, apo drejtim të Durrësit.
