Vllaznia do të udhëtojë në “Niko Dovana” për të sfiduar Teutën në sfidën e javës së 14-të të Superiores. Shkodranët do të synojnë rikthimin te fitorja, pasi 3 pikët iu mungojnë prej 4 javësh.
Në prag të duelit me durrsakët që luhet ditën e nesërme në orën 16:00 ka folur Qatip Osmani. Ky i fundit ka theksuar se mungesat ndikuan në barazimin me Laçin. Ndër të tjera nënvizon se rikthimi i Bekim Balaj është një “armë” plus për shkodranët ndaj “djemve të detit”. Gjithashtu zbulon se ka gati planin për merkaton.
Barazimi me Laçin? Si e shihni tani, më ftohtë, atë takim? Unë jam i kënaqur me angazhimin e lojtarëve, mendoj se na mungoi loja vetëm në 20 metrat e fundit. Na mungoi ideja për të goditur në afërsi të zonës, ku fillon 16-metërshi, ku më shumë ishin të palëvizshëm. Për shkak të kësaj nuk arritëm që të shënonim.
Objektivat? Momentalisht jemi në zonën e ftohtë, por me një fitore mund të jemi më lart. Ne përgatitemi për ta shikuar gjithçka takim pas takimi, pasi loja-lojës nuk i ngjan. Me një fitore shkon lart edhe me një humbje mund të biesh poshtë. Mungesat e Balajt dhe Malës, patjetër që ndikuan shumë. Sikur të kishim vetëm Bekimin do të ishte krejt ndryshe.
Mungesa e Bekimit ndaj Laçit? Natyrisht që ndikuan. Janë lojtarë cilësorë që i duhen shumë këtij ekipi. Balaj një golashënues, ndërsa Mala një fantazist që dihen vlerat e tij.
Gomeshit? Jam i kënaqur me të, pavarësisht se nisur nga gjendja fizike e tij e kisha llogaritur ta mbaja më pak minuta në takimin e tij të parë si titullar. Mendoj se në të ardhmen do të jetë një freski për ekipin.
Pusi? Prej këtij takimi morëm një lojtar cilësor. Në disa momente nuk dukej se është një lojtar i ri, por madje si të ishte me shumë përvojë. Për mua dua t’i them bravo i qoftë dhe të vazhdojëkështu edhe në ndeshjet e tjera.
Stojanoviç mungoi për shkak dëmtimi? Po. Në momentet e nxehjes pati probleme dëmtimi.
Teutës?Do të kemi presion të vazhdueshëm, por duhet që të mësohemi të jetojmë me këtë situatë. Futbolli është i tillë dhe ne në këtë moment jemi jashtë objektivave të klubit. Sigurisht që duhet të bëjmë maksimumin tonë.
Xhaferi ishte në dhomat e zhveshjes çfarë biseduat pas barazimit me Laçin? Bisedë loje, pa gjëra të veçanta. Bisedë si zakonisht pas një humbje se kështu do ta quaj barazimin me Laçin.
Merkatoja? Planet janë. Kemi edhe 5 takime deri në ndërprerjen e kampionatit dhe duhet që të bëjmë më të mirën me këtë kontingjent. Tani s’mund të bëjmë asgjë, por planet janë për t’u forcuar”, ka përfunduar timonieri i kuqebluve.
