Janë zbardhur detaje të reja nga ngjarja e rëndë e regjistruar në fshatin Dhiaspora të zonës së Kilinit, Greqi, ku u gjet i varur në pemën e një banese, 29-vjeçari shqiptar, Angjelo Avdiu, me origjinë nga Lushnja, i cili ishte dhe baba i një fëmije.
Ai rezultonte i zhdukur që prej 30 Tetorit, teksa trupi i pajetë u zbulua nga pronari i shtëpisë së pushimit, i cili jetonte jashtë zonës së Kilini dhe ishte kthyer mbrëmjen e së premtes. Menjëherë sapo ka arritur në banesë, ku nuk kishte qenë prej një kohe të gjatë, ai ka ndjerë aromën e rëndë. Të nesërmen në mëngjes (25 nëntor) ai ka nisur të kërkojë se nga vinte aroma e rëndë dhe është përballur me skenën tragjike.
Pronari i banesës është përballur me pamjet horror, ku 29-vjeçari Angjelo Avdiu ishte i varur në pemë, në një lartësi të madhe prej 4 metrash, që vështirë se vihej re, teksa duart i kishte të lidhura me tel hekuri.
Trupi i 29-vjeçarit është identifikuar nga nëna e tij, e cila ka njohur rrobat e djalit të saj. Familja e Angjelos është tepër e shokuar pasi nuk kanë asnjë të dhënë se çfarë mund të ketë ndodhur me djalin e tyre, ndërsa policia po heton pistën e vrasjes së organizuar.
Problemet me ish-bashkëshorten
Angjelo Avdiu, baba i një fëmije, jetonte në Agios Konstantinos Fthiotidas dhe sipas mediave greke ai ka mbërritur në zonë te shtunën e 30 tetorit, ku ka qëndruar me një të afërm.
Vëllai i tij ka zbuluar se 29-vjeçari kishte shkuar në fshat për të biseduar me ish-bashkëshorten dhe nënën e fëmijës së tij në përpjekje për të rregulluar marrëdhëniet mes tyre.
“Erdhëm të bisedonim me ish-bashkëshorten e tij që ishte divorcuar. Të dielën në mëngjes ishim duke pirë kafe dhe befas ai u largua pa i thënë asgjë askujt. Të gjitha gjërat i la në shtëpi dhe celularin. Bëjmë apel që të gjendet vëllai im sepse nuk ka qenë shumë mirë së fundmi. Ai ka edhe një djalë të vogël, 9 vjeç”, tha ai në atë kohë.
