150 njerëz, përfshirë gra dhe fëmijë, u rrëmbyen, ndërsa një banor u vra në një sulm të armatosur të koordinuar në katër fshatra në shtetin veriperëndimor të Zamfara, Nigeri. Rrëmbimet për shpërblim janë bërë një plagë në Nigerinë veriperëndimore vitet e fundit, pasi bandat e armatosura, të quajtura përgjithësisht banditë nga autoritetet, synojnë qytetarët, nxënësit e shkollave dhe udhëtarët, duke kërkuar çdo herë që të paguhen miliona për lirimin e pengjeve.
Fenomeni ka marrë përmasa të tilla, saqë udhëtimet dhe aktivitetet bujqësore në disa zona tashmë konsiderohen të rrezikshme.
Sipas banorëve, persona të armatosur me dhjetëra motoçikleta nisën bastisje në katër fshatra në rrethin Maru të shtetit. Ndërsa, sipas një zyrtari të zgjedhur lokal, personat e armatosur udhëhiqen nga një Lawali Damana, i cili po kërkon 100 milionë naira (rreth 109,000 euro) nga banorët sepse forcat e sigurisë vranë katër nga njerëzit e tij.
Nigeria vazhdon të përballet me një sërë sfidash sigurie, veçanërisht me kryengritjen xhihadiste 14-vjeçare në verilindje të saj, por edhe aktivitetin separatist në juglindje dhe përplasjet e shpeshta vdekjeprurëse midis fermerëve dhe barinjve në shtetet qendrore.
