Hetimet për video-skandalin sekuesal të ish-kryebashkiakut socialist të Kukësit janë mbyllur nga Prokuroria e Posaçme, që ka çuar në gjykatë kërkesën për gjykim themeli të procesimit penal nr. 145 të këtij viti.
Safet Gjici akuzohet për veprën penale të “Korrupsioni pasiv i funksionarëve të lartë shtetërorë ose i të zgjedhurve vendorë”. Ish-kryebashkiaku ndodhet pas hekurave nën masën e sigurisë “arrest në burg”. Pavarësisht ankimeve me të cilat i është drejtuar gjykatës për masën, nuk është lënë i lirë.
E pandehura tjetër e çështjes është Alma Kaçi. Ndaj saj rëndon akuza për veprën penale “Korrupsioni aktiv i funksionarëve të lartë shtetërorë ose i të zgjedhurve vendorë”. Ajo është hetuar me masën e sigurisë “arrest në shtëpi”.
Masat janë ekzekutuar pas shfaqjes në media të pamjeve ku dukej Alma Kaçi dhe Safet Gjici teksa konsumonin një raport intim në zyrën e Gjicit, në Bashkinë Kukës. Pas raportit, Gjici i premton Kaçit një projekt nga bashkia për sterilizimin e qenve.
“Në përfundim të hetimeve paraprake të këtij procedimi penal, janë përftuar prova dhe të dhëna nga analizimi i të cilave ka rezultuar se e pandehura Alma Kaçi, është personi që i ka ofruar/dhënë përfitime të parregullta të pandehurit Safet Gjici, me detyrë Kryetar i Bashkisë Kukës dhe se ky i fundit pasi ka përfituar prej saj përfitimin e parregullt, në formën e favorit seksual, ka premtuar/pranuar ta ndihmojë me projektin e saj të mbrojtjes së qenve dhe ta paraqiste më tej në mbledhje të Këshillit Bashkiak të Bashkisë Kukës”, thotë SPAK në një njoftim.
Pas publikimit të pamjeve, Gjici dha dorëheqjen. Pavarësisht skandalit, me përsëritjen e zgjedhjeve lokale në Kukës, socialistët fituan sërish bashkinë.
