Reshjet e dëborës kanë përfshirë veriun e vendit këtë të shtunë, duke sjellë probleme me qarkullimin në shumë akse rrugore si dhe ndërprerje të energjisë elektrike. Ndërkohë, për shkak të erës së fortë, ka pasur shtyrje të lundrimeve të trageteve.
Autoriteti Rrugor Shqiptar konfirmoi se në rajonin verior ka pasur reshje dëbore me intensitet. Për pasojë një sërë aksesh rrugore janë mbuluar nga dëbora: Kukës-Krumë, dhe Kukës-Ura e Zapotit, në segmentin rrugor Dushaj-Sheshi i Trageteve-Lekbibaj në lartësinë mbi 700m, në Qafë Thore, në Vau i Dejes-Pukë-Kukës, Fushë Arrëz-Qafë Mali-Kukës, Bajram Curri-Valbonë, Ura Bujan-Qafë Morinë-Tropojë-Shipshan-Sopot-Kërrnaje, Bajram Curri-Fierzë.
Në aksin nacional Bulqizë-Peshkopi, një automjet doli nga rruga e mbuluar nga dëbora.
Probleme u raportuan edhe në Rrugën e Kombit.
Në këto akse, sipas ARRSH, grupet e punës janë në terren me mjete dhe punëtorë për pastrimin e rrugës dhe shpërndarjen e kripës. Autoritetet ndërkohë bënë apel për përdorimin e zinxhirëve.
Orët e pasdites situata u shfaq e rënduar te aksi rrugor bypass-Qafë Murrizë, ku bora bllokoi plotësisht rrugën. Policia njoftoi se qarkullimi i mjeteve do të bëhet nga aksi i vjetër rrugor Klos-Burrel-Ulëz.
Probleme në disa zona në veri të vendit është raportuar dhe me furnizimin me energji elektrike, si dhe në disa fshatra në Fier.
Moti me erë të fortë ka sjellë po ashtu problematika për sa i përket lundrimit.
Drejtoria e Përgjithshme Detare njoftoi se anijet pasagjere të linjës Durrës-Bari, Bari-Durrës, nuk do të nisen në orarin e caktuar, por do të nisen nga të dy portet respektive nesër në mesdite. Njoftoi po ashtu se trageti i linjës Ankona-Durrës mbërrin nesër në Durrës, në mesditë.
Sipas drejtorisë detare, anijet e transportit ndërkombëtar detar për pasagjere dhe automjete që operojnë në portin e Vlorës në linjën Vlorë-Brindisi-Vlorë sot e kanë ndërprerë lundrimin për shkak të kushteve hidrometeorologjike të përkeqësuara.
Ndërkohë, linja Sarande-Korfuz-Sarandë ka vazhduar normalisht pa probleme.
“Të interesuarit të kontaktojnë agjencitë respektive për informacione të mëtejshme”, apelon drejtoria detare.
Sipas meteorologëve, duke filluar nga orët e mbrëmjes së kësaj të shtune pritet një përmirësim gradual i kushteve meteorologjike, ku reshjet e shiut dhe të borës do të humbasin intensitet dhe territor. Dita e diel ndërkohë parashikohet të ketë mot kryesisht të kthjellët, por të ftohtë.
