Policia ndërmori një operacion të gjerë në kryeqytet pasditen e djeshme, pas 12 urdhër-arresteve të lëshuara nga SPAK, për emra të njohur të krimit dhe Policisë së Shtetit.
Së fundmi janë zbardhur të tjera detaje në lidhje me operacionin e SPAK. Një prej të arrestuarve, është Bujar Gërmizi, akuzohet se po planifikonte me Besmir Mustatin dhe me shefin e krimeve në komisariatin numër 6, Dedan Gjonin për të kryer një atentat ndaj 2 vëllezërve që jetojnë në Britaninë e Madhe për shkak të përplasjeve që kishin për çështje droge, i kishte vënë në shënjestër.
E përfshirë në këtë grup kriminal dyshohet se është oficerja e drejtorisë së kufirit dhe migracionit, Jonida Babameton, ndaj të cilës është caktuar masa ‘detyrim paraqitje’.
Babameto mësohet se gjatë kohës kur punonte në “Interpol” u ka dhënë informacione nga sistemi për dy objektivat që jetonin në Angli. Deri më tani dyshohet se plani për vrasjen e dy vëllezërve ishte bërë pas konflikteve për pazaret e drogës.
Mësohet se Gërmizi është shoqëruar nga Kukësi drejt Policisë së Drejtorisë së Tiranës nën masa të rrepta sigurie.
