Një tjetër familje shqiptare është larguar nga Gaza dhe kanë mbërritur në Shqipëri.
Lajmi është bërë me dije nga ministri i Jashtëm, Igli Hasani, i cili ka njoftuar se Eiadi, gruaja e tij dhe katër fëmijët e tyre të mitur tashmë do të jenë të qetë në Shqipëri.
“Më në fund, Eiadi, gruaja e tij dhe katër fëmijët e tyre të mitur u larguan nga Gaza dhe do t’i bashkohen pjesës tjetër të familjes që kanë mbërritur në Shqipëri në fillim të këtij muaji. Operacioni sfidues përfundoi me sukses sot në mesditë, falë bashkëpunimit të diplomatëve tanë në Tel Aviv dhe Kajro si dhe Ministrive të Jashtme të Izraelit dhe Egjiptit. Mirënjohje të gjithë kolegëve të përfshirë në këtë proces”, shkruan ministri.
Evakuimi i parë ndodhi në fillim të muajit nëntor, ku një nënë me 4 fëmijët e saj u evakuuan në Shqipëri, pas nisjes së luftës.
