Gazetari Eni Ferhati e cilësoi një amnisti të dytë ndaj ish-ministrit të Shëndetësisë Ilir Beqaj, masën e sigurisë “Detyrim paraqitje” të dhënë nga GJKKO. I ftuar në Euronews Albania, Ferhati tha se në vendimin e zbadhur të GJKKO në muajin gusht, kur u dhanë masat e para të sigurisë për sterilizimin, gjykata i kërkoi SPAK që të hetonte më tej për ish-ministrin Beqaj.
Ai shtoi se me “Shpërdorim detyre” Beqaj mund të marrë një dënim tepër të lehtë deri në dy vite burg, në një moment kur GJKKO kërkoi që të hetohet dhe për korrupsion. Ferhati tha rastin e Beqaj është ndjekur një standard i dyfishtë pasi për raste analoge është dhënë masa e sigurisë “Arrest me burg”.
“Unë e kam pritur dhe një masë më të rëndë sigurie. Unë e prisja se kam lexuar vendimin e zbardhur. Sot Ilir Beqja akuzohet vetëm për “Shpërdorim detyre e kryer në bashkëpunim”. Ndërkohë që gjykata thotë shtriji hetimet për më tej. Ai rrezikon 1 deri në 2 vite burg që është dhe marzhi për këtë vepër penale nisur dhe nga dënimet që kanë marrë dhe ish-zyrtarë të lartë. Për çfarë e shpërdoroi detyrën Ilir Beqaj, për qejf?! E shpërdoroi nga padijenia, apo për arsye të tjera?! Logjika të thotë se e shpërdori për të patur përfitime të mundshme, kur bëhet fjalë për një koncesion me vlera kaq të mëdha. Ndaj unë shikoj një amnisti të dytë për zotin Beqaj me këtë procedim penal. Janë vendime të rrala të gjyqtarëve që i thonë SPAK-ut shiko ka vend më tepër, ose ke gabuar për faktet penale”, tha Ferhati.
Gazetari tha se me hetimin e zyrtarëve dhe ish-zyrtarëve SPAK po tregon sot që ka guxim. Ferhati përmendi se me tënjën akuzë, Vangjush Dako dhe Lefter Alla sot janë në burg dhe shtroi pyetjen se pse Ilir Beqaj duhet të jetë i lirë.
“Dako për të njëjtën akuzë është në burg, Lefter Alla gjithashtu. Pse Beqaj të jetë i lirë? Kontrata origjinale e sterilizimit nuk është gjetur nga SPAK ku ka shkuar për ta sekuestruar. Nuk besoj që ky fakt e ka penguar hetimin. Ka pasur lajme jo të konfirmuara që mund të ketë pasur kërkesë nga Beqaj për masë më të lehtë sigurie për shkak të një problemi shëndetësor. Gjithë ish-zyrtarët po dalin të sëmurë kur vihen para akuzës. Hetim pasuror nuk ka deri në këto momente. Gjykata e thioë se nëse gjenden pasuri të pajustifikuara, hetoni nëse ka pasur korrupsion”, tha gazetari.
