Golashënuesi më i mirë i kombëtares së Moldavisë, Ion Nikolaesku, në një rrëfim për mediat moldave zbulon sekretet e suksesit të tij në futboll dhe burimet e motivimit.
Ai kujton momentet më të rëndësishme në ekipin kombëtar dhe tregon se si e ndihmon eksperienca e tij në Herenven te Moldavia.
Në prag të sfidës ndaj kuqezinjve tanë, sulmuesi ka dhënë edhe “recetën” se si mposhtet Shqipëria.
– Çfarë do të thotë për ju që jeni golashënuesi më i mirë i kombëtares së Moldavisë në histori? 14 golat për ekipin tonë thonë diçka…
Është një nder i madh për mua të jem golashënuesi më i mirë i kombëtares në histori. Për mua 14 golat nuk janë thjesht statistikë, janë dëshmi e punës dhe përkushtimit tim në fushë. Kjo është një arritje për të cilën jam thellësisht mirënjohës. Jam krenar që mund të kontribuoj në suksesin e kombëtares dhe të lë gjurmë në historinë e futbollit moldav.
– E ndjeni presionin për të qenë golashënuesi më i mirë në grupin E kualifikues për EURO 2024? Për herë të parë në histori, një moldav kryeson listën e golashënuesve dy raunde para fundit.
Presioni është real, por e konsideroj një burim motivimi që më jep mundësinë të zgjeroj aftësitë e mia. E di që të gjithë sytë janë tek unë dhe se tifozët moldavë shpresojnë për suksesin e ekipit tonë. Fakti që jam në krye të listave të golashënuesve në një grup me lojtarë si Robert Levandovski më bën të dëshiroj të vazhdoj.
– Çfarë emocionesh përjetuat kur shënuat tre golat kundër një kundërshtari kaq të fortë si Polonia?
Shënimi i tre golave kundër Polonisë ishte një sensacion i vërtetë. Çdo gol ishte një kombinim i ambicies, guximit dhe punës në grup. Një fitore ndaj një ekipi si Polonia sjell jo vetëm kënaqësi personale, por është edhe një fitore për të gjithë kombin, në rastin tonë Moldavinë. Ishte padyshim një përvojë e pabesueshme dhe emocionale. Është një ndjenjë e pakrahasueshme t’u sjellësh gëzim tifozëve moldavë me golat e tu. Ndjehem sikur po i dëshmoj vetes dhe ekipit tim se mund të konkurrojmë në një nivel të lartë.
– Si do ta karakterizonit atmosferën në dhomën e zhveshjes së kombëtares së Moldavisë para ndeshjeve të rëndësishme?
Ka një atmosferë përqendrimi në dhomat e zhveshjes para ndeshjeve të rëndësishme. Ne jemi si familje dhe mbështesim njëri-tjetrin sepse kemi një qëllim të përbashkët. Secili lojtar e kupton rëndësinë e rolit të tij në fushë dhe sa e rëndësishme është të luftojmë për suksesin e ekipit tonë.
– Si e vlerësoni ecurinë e kombëtares së Moldavisë në këtë fushatë kualifikuese dhe cilat aspekte i konsideroni si kyç të suksesit për momentin?
Besoj se ekipi ynë ka bërë përparim të dukshëm në këtë fushatë kyalifikuese. Faktori kryesor i suksesit ishte kohezioni dhe puna ekipore e trajnerit dhe të gjithë ekipit. Mësova nga çdo ndeshje dhe iu afrova çdo kundërshtari me seriozitetin më të madh.
– Cilat janë pritshmëritë tuaja nga ndeshja me Shqipërinë dhe cila është taktika e skuadrës për të fituar tre pikët në këtë ndeshje të rëndësishme?
Ndeshja ndaj Shqipërisë është jashtëzakonisht e rëndësishme, ndoshta më e rëndësishmja në të gjithë kualifikuesen dhe mezi pres të jap gjithçka në fushë për të marrë 3 pikët. Taktikat tona do të bazohen në mbrojtjen e fortë, lojën ekipore dhe shfrytëzimin e mundësive. Ne duam të arrijmë fitoren për Moldavinë.
– Çfarë do t’u thoshit tifozëve moldavë që ëndërrojnë hyrjen historike të kombëtares në Kampionatin Evropian?
Unë u përcjell mbështetësve tanë se ne e dimë ëndrrën e tyre dhe do të luftojmë me të gjitha forcat për ta realizuar atë. Dëshira e tyre për të na parë në pjesën e fundit na motivon çdo ditë. I falënderoj për mbështetjen e tyre dhe i inkurajoj të qëndrojnë me ne në këtë rrugëtim.
– Cili ka qenë momenti më emocionues që keni përjetuar në ndeshjen për kombëtaren e Moldavisë?
Momenti më emocionues që kam përjetuar në ndeshjen për kombëtaren e Moldavisë ishte padyshim kur shënova golin e parë për ekipin. Ishte një moment gëzimi dhe krenarie në të njëjtën kohë, sepse ndjeja se po jepja një kontribut të vërtetë për suksesin e ekipit. Çdo gol i shënuar për Moldavinë është i veçantë për mua. Nuk mund ta harroj ndeshjen me Poloninë, kur theva rekordin e më shumë golave për kombëtaren. Ky ishte konfirmimi i punës dhe përkushtimit tim ndaj futbollit moldav. Kam përjetuar emocione të dyfishta gëzimi: si për shënimin e një goli kundër ekipit të Levandovskit, ashtu edhe për golin tim të 12-të për kombëtaren.
– Çfarë do të thotë për ju të jeni model për futbollistët e rinj në Moldavi dhe cilat janë synimet tuaja personale dhe ekipore për të ardhmen e afërt?
Unë gjithmonë përpiqem të jap një shembull të mirë përmes punës së palodhur, përkushtimit dhe lojës së ndershme. Shpresoj që të mund t’i frymëzoj lojtarët e rinj që të ngulmojnë për ëndrrat e tyre dhe të besojnë se mund t’ia dalin në skuadrat e mëdha. Qëllimi im personal është të vazhdoj të zhvillohem si lojtar dhe të ndihmoj ekipin tim të arrijë lartësi të reja. Së bashku ne përpiqemi të arrijmë në raundet e fundit të garave ndërkombëtare dhe të kënaqim Moldavinë me paraqitjet tona.
– Si u përshtate me stilin e lojës së Herenven dhe si ndikon kjo në performancën tënde për kombëtaren e Moldavisë?
Përvoja ime në Herenven është shumë e vlefshme. Mësova shumë aspekte të të luajturit në një ligë konkurruese të ndryshme nga ajo në Moldavi. Kjo më ndihmoi të sjell njohuri dhe aftësi të reja në ekipin kombëtar. Puna me trajnerët dhe lojtarët e Herenven
