Drejtor Genti Gazheli dhe vartësit e tij i kanë zhytur Doganat në borxhe. Megjithëse Drejtoria e Përgjithshme e Doganave përfton një buxhet të lartë, Gazheli nuk shlyen detyrimet. Ky institucion ka 46,690,911, 000 lekë detyrime të papaguara. Kontrolli i Lartë i shtetit ka konstatuar se ky borxh po shtohet vit pas viti, vetëm në vitin 2022 ai është rritur me 9.7 miliardë lekë, çka do të thotë se deri në fund të këtij viti do ketë kaluar shifra mbi 46 miliardë lekë.
“Në Drejtorinë e Përgjithshme të Doganave (DPD), në fund të vitit 2022, rezulton një nivel borxhi doganor në shumën 46,690,911 mijë lekë, e përfaqësuar nga 4,858 raste, i cili rezulton gjithmonë në rritje, ku për vitin 2022 ka pësuar një rritje prej 979,324 mijë lekë, ose me 2,14%”, thuhet në raportin e KLSH.
Është e qartë që këto para do të vilen nga qytetarët shqiptarë, sepse Gazheli nga xhepi i tij nuk nxjerr asgjë, por nuk kuptohet pse lejohet të bëjë tendera dhe shpenzime pa shlyer këtë borxh.
Më tutje KLSH konstaton se Drejtoria e Doganave e ka fshehur këtë borxh, duke thelluar kështu skandalin dhe duke rritur riskun në buxhetin e shtetit. Borxhi konkret është 30 milionë lekë më shumë nga se ka raportuar Gazheli.
“Nga auditimi konstatohet një diferencë në borxhin doganor prej 3,101 mijë lekë më shumë se borxhi i raportuar nga ana e Drejtorisë së Planifikimit dhe Analizës së të Ardhurave, si rezultat i raportimit të gabuar nga ana e Degës Doganore Rinas”, thekson auditi.
58 milionë lekë humbje për të mbuluar shkelësit
Në raportin e fundit, KLSH shprehet se borxhi rritet për shkak se në raste shkeljesh, drejtoria e Hetimeve tek Doganat nuk aplikon masat ligjore ndaj abuzuesve, por vendos ndaj tyre masa më të lehta. Një mënyrë kjo për të favorizuar biznesmenët miq që kalojnë mallra në doganë pa paguar taksat.
Sipas KLSH në vitin e shkuar janë konstatuar 58 milionë lekë dëm nga Dogana vetëm se ka mbuluar shkelësit e ligjit.
“Ka rezultuar se në 75 raste të evidentuara si kontrabandë nga ana e Drejtorisë së Hetimit, gjatë konstatimit të shkeljes nga ana e kësaj Drejtorie nuk janë konsideruar edhe kundërvajtje me masë administrative në kundërshtim me përcaktimet e pikës 1 të nenit 259 dhe me nenet 260, 262, 268 dhe 274 të Ligjit nr.102/2014 “Kodi Doganor i Republikës së Shqipërisë” të ndryshuar, duke sjellë të ardhura të munguara për buxhetin e shtetit në vlerën 3,750,000 lekë (50,000 lekë*75 raste). Pra, gjithsej kanë rezultuar të ardhura të munguara për buxhetin e shtetit në vlerën prej 5,837,317 lekë, nga veprimet dhe mosveprimet e Drejtorisë së Hetimit në DPD”, thuhet në raport.
82 milionë lekë për shkarkime të padrejta në 2022
Drejtoria e Doganave është denoncuar disa herë në media, edhe nga Gijotina.com, për nepotizëm dhe punësime në shkelje të ligjit. Vitin e shkuar personat e hequr padrejtësisht nga puna kanë kërkuar dëmshpërblim për largimin. Këto gjyqe i kanë kushtuar 82 milionë lekë buxhetit të shtetit.
Behët fjala për shkarkimin e 8 ish-punonjësve, të cilët deri më tani janë likuiduar deri në masën 58 milionë lekë, pjesa tjetër që duhet shlyer ka mbetur si borxh.
“Referuar vendimeve të përcjella për t’u likuiduar, rezultojnë të kenë mbetur pa paguar deri në datën 31.12.2022 vendime për ish punonjës në vlerën 2,362,000 lekë, të cilat janë likuiduar përgjatë muajit Janar dhe Shkurt të vitit 2023. Pra në total, rezultojnë 9 vendime në vlerën totale prej 8,210 mijë lekë, ku 3 vendime i përkojnë vitit 2022, dhe 6 vendime të periudhave të mëparshme”, thuhet në raport
Kështu, Gazheli ka krijuar një institucion që jo vetëm krijon borxhe, por mbjell padrejtësinë përmes favorizimit të shkeljes së ligjit në Doganë./Gijotina.com
