Nga Boldnews.al
Komisioneri Shtetëror i Zgjedhjeve, Ilirjan Celibashi, pritet të mos marrë asnjë masë penalizuese për kryebashkiakun e Kuçovës, Kreshnik Hajdari, megjithëse u konfirmua zyrtarisht se ai është dënuar penalisht në Greqi dhe këtë fakt e ka fshehur në formularin e “Dekriminalizimit”.
Prokuroria e Përgjithshme njoftoi zyrtarisht Komisionin Qendror të Zgjedhjeve më 2 nëntor të këtij viti se Hajdari është dënuar me 4 muaj burgim nga Gjykata e Janinës në vitin 1999, për shkelje të paligjshme të kufirit.
Të dhënat e autoriteteve greke tregojnë se dënimi i dhënë për Kreshnik Hajdarin, në atë kohë 17 vjeç, ishte konvertuar në gjobë që llogaritej në shumën 1500 dhrami për çdo ditë burgu.
Procesi gjyqësor në Gjykatën e Janinës rezulton të jetë ndjekur personalisht nga Kreshnik Hajdari dhe ai është deportuar menjëherë pas përfundimit të procesit gjyqësor.
Kreshnik Hajdari ka pasur detyrimin ligjor për t’i deklaruar këto të dhëna në formularin e “Dekriminalizimit”, në momentin kur ai vendosi të kandidojë për drejtimin e Bashkisë së Kuçovës, në Mars të vitit 2023.
Por, siç rezulton nga formulari që i dorëzuar në KQZ, Hajdari nuk ka deklaruar faktin që është dënuar penalisht dhe është deportuar, ndërkohë që ka pasur dijeni, si për vendimin e gjykatës, ashtu edhe vendimin e autoriteteve policore për deportimin e tij nga Greqia në drejtim të Shqipërisë.
Ligji “Për garantimin e integritetit të personave që zgjidhen, emërohen ose ushtrojnë funksione publike”, i njohur si “Ligji i Dekriminalizimit”, u miratua në vitin 2015.
Ai mbështetet në, më së paku dy shtylla kryesore; detyrimin e zyrtarëve për të deklaruar çdo lloj vendimi dënimi penal, edhe në rastet kur ato janë shuar, parashkruar apo rehabilituar; si edhe ndalimin për të qenë pjesë e administratës e çdo personi të dënuar me një vendim penal me burgim mbi 6 muaj.
Dënimi i dhënë nga Gjykata e Janinës me 4 muaj burgim duket se nuk duhet të përbënte kriter ndalues për zgjedhjen e Kreshnik Hajdarit në postin e kryetarit të Bashkisë së Kuçovës.
Por, ai rezulton se nuk e ka deklaruar aspak dënimin penal, si edhe fakti që është deportuar nga Greqia, duke e vendosur veten në pozitën e personit që ka kryer veprën penale të “Falsifikimit të formularëve”.
Megjithatë, ai duket se nuk do ta humbasë mandatin e kryebashkiakut në mbledhjen e Komisionit Qendror të Zgjedhjeve, të parashikuar për t’u zhvilluar këtë të Martë (dt. 14.11.2023).
Në një rast të ngjashëm, Komisioneri Shtetëror i Zgjedhjeve, Ilirjan Celibashi, është shprehur në favor të qëndrimit në detyrë të kryebashkiakut të Mallakastrës, Qerim Ismailaj, i dënuar nga gjykatat greke me 3 vjet burgim për plagosje, në vitin 1998.
Në rastin e Qerim Ismailajt, Celibashi bëri një interpretim të tijin, duke deklaruar se vepra për të cilën ishte dhënë nga gjykatat greke i përkonte veprës penale të “Rrahjes” në legjislacionin penal shqiptar dhe ai nuk do të humbiste mandatin, edhe sikur ta kishte deklaruar këtë vendim.
Pra, Celibashi e përjashtoi tërësisht nga përgjegjësia kryebashkiakun e Mallakastrës për faktin se ai kishte fshehur dënimin penale në formularin e “Dekriminalizimit”.
Madje, Qerim Ismailaj më vonë u dënua nga Gjykata e Posaçme Kundër Korrupsionit dhe Krimit të Organizuar (GJKKO) për “falsifikim të formularëve”, pikërisht për faktin se nuk kishte shënuar të dhënat e dënimit në Greqi në dokumentin e “Dekriminalizimit”.
Pavarësisht qëndrimit të mbajtur nga GJKKO, Ilirjan Celibashi do të mbaj të njëjtin standart vlerësimi edhe për kryebashkiakun e Kuçovës, Kreshnik Hajdari, i cili, njëlloj si kolegu i tij i Mallakastrës, nuk ka deklaruar dënimin penal në Janinë, si edhe nuk ka bërë asnjë shënim për deportimin e tij në Greqi.
