Ndeshja mes Egnatias dhe Partizanit që po luhet në Rrogozhinë shkaktoi një frikë të madhe.
Sulmuesi Raphael Dwamena në minutën e 24-të është rrëzuar pa ndjenja në fushë ndërsa historiku i sulmuesit që ka pasur probleme me zemrën në të kaluarën tremb edhe më shumë.
E menjëhershme ndërhyrja e stafit mjekësor teksa futbollistët e të dyja skuadrave e rrethuan sulmuesit në mënyrë që pamjet e rënda të mos transmetoheshin. Ambulanca e transportoi lojtarin në spital teksa të gjithë shpresojnë më të mirë për Dwamenën.
Sulmuesi ka një problem në zemër dhe është këshilluar nga mjekët në Zvicër në vitin 2019 që të lërë futbollin.
Për shkak të një defribilatori të vendosur në zemrën e sulmuesit, mjekët e këshilluan që të linte sportin. Pas rikthimit në fushë gjatë 2022 me BSC Old Boys në kategorinë e pestë zviceriane dhe tetë golave të shënuar, sulmuesi kërkon një “jetë të dytë” në elitën e Shqipërisë.
Nënshkrimi i tij në ligën profesioniste të Shqipërisë bëri bujë në mediet zvicerane, kjo për shkak të problemeve me zemrën. Dwamena ka qenë pjesë e Zurich, Levante, Real Zaragoza dhe në 2019 ishte gati të nënshkruante me Brighton në Premier League por u ndal nga problemet në zemër.
Aktualisht ai është golashënuesi më i mirë i kampionatit shqiptar.