Në Tiranë, zonja Zejnebi Dervishi është një pensioniste, e cila para një viti ka pësuar një aksident dhe ka mbetur e paralizuar. Megjithëse është drejtuar për kemp, zonja është refuzuar.
Me lot në sy, ajo tregon për emisionin investigativ “Stop” në Tv Klan se prej 11 muajsh nuk lëviz nga krevati dhe është me pelena.
Gazetarja: Sa vite ka që je në këtë gjendje?
Denoncuesja: Kam afro 1 vit.
Gazetarja: Çfarë të ndodhi?
Denoncuesja: U rrëzova dhe që në momentin që u rrëzova, nuk u çova dot më. Jam pensioniste.
Gazetarja: Ju a e keni humbur lëvizshmërinë e këmbëve?
Denoncuesja: Jo, unë nuk lëviz fare, fare nga këmbët. Unë as duart pas operacionit nuk i menaxhoj dot.
Gazetarja: Në lidhje me këtë situatë që keni kaluar, dokumentacionin, epikrizën, a keni dorëzuar për të përfituar statusin e tetraplegjikëve?
Denoncuesja: Po.
Gazetarja: Pra, ti nuk ke as pension invaliditeti, as kujdestar?
Denoncuesja: As kujdestar dhe burrin e kam pa punë dhe fëmijët e mi.
Gazetarja: Po kush kujdeset për ty?
Denoncuesja: Burri im kujdeset sepse burri im nuk shkon në punë.
Gazetarja: Çfarë moshe keni?
Denoncuesja: Unë jam 68 vjeçe. Jemi moshatarë me burrin. Ka 11 muaj që unë nuk lëviz fare, fare. Ka 11 muaj që unë jam me pampers.
Gazetarja: Mos u mërzit, do të bëjmë maksimumin për ju.
Për këtë rast, Shërbimi Social Shtetëror sqaron se e moshuara ka dalë në Komisionin Rajonal të Tiranës me divergjencë, pasi ka votuar kundër një anëtar dhe dosja është në komisionin epror.
Nga ana tjetër Shërbimi Social Shtetëror u shpreh se për rastet e transmetuara në “Stop” që merrnin kemp në mënyrë abuzive, janë ndërprerë pagesat dhe janë thirrur për rikomisionim dhe ekzaminime të gjendjes aktuale./tvklan
