Kur kanë kaluar më shumë se 6 muaj nga momenti kur Agjencia e Mbikëqyrjes Policore u ngarkua për zhvillimin e procesit të Vetingut në radhët e policisë, deri tani në këtë filtër kanë kaluar vetëm 3 subjekte.
Vendimet e marra nga komisionet e ngritura brenda AMP, pas shkrirjes së komisionit të jashtëm të vlerësimit, nuk lidhen me konfirmimin ose jo në detyrë të subjekteve të verifikuara, por me përjashtimin e tyre nga procesi i vlerësimit kalimtar.
Tetori duhet të ishte muaji ku AMP të shpallte vendimet për 34 drejtuesit më të lartë të policisë, të shortuar në muajin Prill të këtij viti, për t’iu nënshtruar procesit të Vetingut. Por, deri tani për asnjë prej tyre komisionet vlerësuese nuk kanë arritur të përmbyllin verifikimin e pasurisë, pastërtinë e figurës dhe aftësive profesionale të gjithsecilit prej tyre.
Tv Klan u interesua pranë AMP lidhur me këtë vonesë, dhe mësoi se shkak për ngecjen e këtij procesi janë bërë institucionet ligjzbatuese të cilat kanë kaluar çdo afat në kthimin e përgjigjeve sa i takon përputhshmërisë së deklarimeve të drejtuesve të policisë.
Ritmi i deritanishëm na kthen pas në kohë, e konkretisht në ligjin e vjetër për vetingun në polici tashmë të shfuqizuar, nën efektet e të cilit u vetuan 37 drejtues të lartë të policisë, nga të cilët 35 prej tyre u konfirmuan në detyrë.
