Partitë opozitare në Itali janë shprehur se marrëveshja mes Edi Ramës dhe Giorgia Melonit është kundër ligjeve të BE-së, marrëveshjeve ndërkombëtare si dhe kundër të drejtave të njeriut.
Partia Demokratike, një nga forca kryesore opozitare në Itali, thotë se marrëveshja nuk zgjidh krizën e emigracionit, por është një lëvizje strategjike e Melonit.
Lëvizja 5 Yjet thotë se marrëveshja është një farsë e Melonit dhe nuk do të sjellë asnjë ndryshim për problemin e emigrantëve. Kjo forcë politike thotë se do të kërkojë nga Komisoni Europian detaje për mënyrën sesi kjo marrëveshje respekton të drejtat e njeriut.
Rikardo Magi, sekretar i Partisë Plus Europa, thotë se kjo marrëveshje po krijon në Shqipëri një burg të ngjashëm si ai i Guntanamos. Sipas tij, kjo marrëveshje krijon një kamp jashtë Italisë pa marrë parasysh asnjë ligj ndërkombëtar dhe pa mundësinë që kampet të kontrollohen në mënyrën e duhur. Gjithashtu, sipas tij, Italia nuk mund të veprojë në kundërshtim me ligjet e Bashkimit Europian lidhur me qytetarët e huaj.
