Ish-kryeministri Sali Berisha duhet të paraqitet këtë të hënë përpara oficeres së policisë gjyqësore në SPAK. Sipas vendimit të Gjykatës së Posaçme, Sali Berisha, dy herë në muaj, të hënën e parë dhe të tretë e ka të detyruar të shkojë në SPAK.
Pra këtë të hënë datë 6 nëntor ai duhet të jetë në 10:00 te oficerja e policisë gjyqësore. Nëse nuk shkon, atëhere Gjykata e Posaçme mund të marrë masë më shtrënguese për Berishën.
Sipas nenit 231 të Kodit të Procedurës Penale, në rastet kur ka shkelje të masave të sigurimit, gjykata mund të vendosë një masë tjetër me të rëndë.
“Në rast shkelje të detyrimeve që lidhen me një masë sigurimi, gjykata mund të vendosë zëvendësimin ose bashkimin me një masë tjetër më të rëndë, duke mbajtur parasysh rëndësinë, motivet dhe rrethanat e shkeljes. Për shkeljen e detyrimeve që lidhen me një masë ndaluese, gjykata mund të vendosë zëvendësimin ose bashkimin me një masë shtrënguese”, shkruhet te nenin 231 të Kodit të Procedurës Penale.
Por ish-kryeministri Berisha ka deklaruar se nuk do të paraqitet pasi sipas tij vendimi i gjykatës është antikushtetues. Sipas tij, prokuroria dhe gjykata kanë anashkaluar institucionin e Kuvendit në vendosjen e masës ndaj tij.
Ndërkohë, në orën 10:30, grupi parlamentar demokrat pritet të zhvillojë një mbledhje në kryesinë e kuvendit.
