Kryenegociatiori i Serbisë në dialog me Kosovën, Petar Petkoviç tha se Kosova e ka refuzuar ftesën për dialog ndërmjet negociatorëve kryesorë në nivel teknik, i cili sipas tij duhej të mbahej nesër në Bruksel.
Presidenti serb, Aleksandër Vuçiç tha gjithashtu se një raund i ri i dialogut është dashur të mbahet në Bruksel më 6 ose 7 nëntor, por se pala kosovare nuk ka pranuar.
Petkoviç tha se më 30 tetor, i dërguari i BE-së, Miroslav Lajçak, i dërgoi një email Prishtinës dhe Beogradit për një raund të ri të dialogut që duhej të zhvillohej nesër, më 7 nëntor.
“Beogradi i është përgjigjur menjëherë asaj ftese me email më 2 nëntor dhe po ashtu ka deklaruar se delegacioni ynë do të vijë në Bruksel për bisedime. Mirëpo, Prishtina dhe negociatori i saj Besnik Bislimi thjesht e refuzuan atë ftesë, prandaj më 3 nëntor u njoftuam nga BE-ja se takimi i nesërm në Bruksel thjesht u anulua”, tha Petkoviç për Tanjug.
