Kryeqyteti është përfshirë mesditën e kësaj të premte nga reshje të dendura shiu.
Reshjet kanë bërë që Lumi Lana të dalë nga shtrati dhe të vërshojë në rrugë duke bllokuar rrugë, trotuare si dhe përmbytur disa biznese.
Ndërkohë në disa video që janë publikuar nga Kastriot Dervishi në fb, shihet se uji futet brenda në autobus dhe qytetarët alarmohen për situatën e krijuar.
“Çasti kur uji i Lanës hyn në autobusin e linjës brendaqytetëse të Tiranës së Re, te zona e pallatit me shigjeta. Falë motorrit të mjetit, i cili nuk u fik, por qëndroi, bllokada e ujit u ça me sukses”,- shkruan Dervishi krahas Videove.
Probleme gjithashtu ka pasur dhe në rrugë të tjera, ku pusesat e bllokuara kanë bërë që rrugët dhe trotuarët të mbulohen nga uji dhe qarkullimi i mjeteve dhe qytetarëve të vështirësohet shumë.
Ndërkohë, trafiku në Tiranë është paralizuar dhe autostrada Durrës-Tiranë është e bllokuar.
