Nga Boldnews.al
Në prill të vitit 2023, BoldNews.al denoncoi tentativat e Agjencisë Kombëtare të Ujësjellës Kanalizimeve se po “ndihmonte” të pasurit, ata që janë shpallur investitorë strategjikë në zonat bregdetare jugore. Në atë kohë ne e titulluam investigimin “Edi Rama i bën ujësjellës 7 milionë euro burrit të Olta Xhaçkës në Dhërmi”, ndërsa në fund të tetorit po të këtij viti kjo Agjenci ka vijuar më tej.
Madje, ka publikuar dokumentet e këtij supertenderi, ku përveç burrit të Xhaçkës do të përfitojnë edhe të gjithë strategjikët e tjerë. Që nga, Artan Gaçi, Papuli, Gjikuria e të tjerë. Pra, paratë e taksave të të varfërve do të shkojnë për shërbime për oligarkët. Këta të fundit, pasi morën tokën falas në bregdet, madje prej qindra hektarësh, do të kenë edhe Ujësjellësin nga shteti. Rrjetin e ujërave të zeza. Rërën falas, rrugët e gjithçka tjetër!
Dokumenti i mësipërm është hapja e tenderit për ujësjellësin e strategjikëve. Procedura është shpallur nga Agjencia Kombëtare e Ujësjellës Kanalizimeve dhe Infrastrukturës së Mbetjeve, një institucion në varësi direkte të ministrisë së Infrastrukturës dhe Energjisë, e cila drejtohet nga zv.kryeministrja Belinda Balluku.
Objekti i procedurës është “furnizimi me ujë të zonave bregdetare, zonat e investimit strategjik, Draleos, Drimadhës dhe Dhërmi”. Por, siç edhe lexohet kjo është vetëm faza e parë, pasi pritet që të ketë edhe faza të tjera me fonde edhe më të mëdha. Fondi i kësaj procedure është 743.232.358 lekë pa TVSH, vënë në dispozicion nga Buxheti i Shtetit. Paratë janë të buxhetit, i cili akordon një shumë të madhe prej rreth 7.5 milionë euro për këtë ujësjellës. Mësohet se kohëzgjatja e kontratës për zbatimin e saj është 18 muaj, ndërsa afati për paraqitjen dhe hapjen e ofertave është data 30 nëntor 2023 në orën 11.00.
Dokumenti i mësipërm është publikuar nga Agjencia Kombëtare e Ujësjellësit, teksa vërehet se ujësjellësi do të shtrihet në të gjithë gjatësinë e Palasës, Dhërmiut. Gjurma kalon mbi Green Coast, vilat elitare që janë bërë edhe ato që pritet të bëhen në të ardhmen. Në dokumentet e AKUM-it shihet se projekti përfshin edhe vilat që s’janë bërë. Apo edhe hotelet që do të ndërtojnë strategjikët e Ramës në atë zonë. Por, projekti shtrihet edhe të investitorët e tjerë, që nga Gaçi apo edhe Papuli. Disa ditë më parë, Gaçit iu sekuestrua një pasuri e konsiderueshme nga SPAK-u pasi dyshohet se ishte marrë në mënyrë të paligjshme. Megjithatë, kjo s’e ka penguar Ballukun me vartësit e saj që t’i çojnë Ujësjellësin te projekti, i cili s’ka filluar ende të bëhet. Por, Balluku do të bëjë edhe një tjetër fazë ku do të përfshijë të gjithë.
Disa javë më parë, BoldNews.al publikoi një investigim me titull “Edi Rama i bën ujësjellës 7 milionë euro burrit të Olta Xhaçkës në Dhërmi”, teksa redaksia shkruante se “Artan Gaçi, një ish-deputet i Partisë Socialiste, është shpallur një vit më parë Investitor Strategjik në një nga zonat më të bukura të Shqipërisë, Dhërmi. Ish-deputeti është njëherësh edhe bashkëshorti i ministres se Jashtme, Olta Xhaçka, ndërkohë që ka konflikt të pastër interesi”.
Më tej, artikulli vijonte se përpos diskutimeve politike për përfitimet e firmës së Gaçit dhe familjarëve të Xhaçkës, mazhoranca “nuk e ka vënë ujin në zjarr”, teksa ka vijuar që të favorizojë këtë çift, duke iu bërë edhe një ujësjellës me shpejtësinë më të madhe. Pra nga njëra anë ata përfitojnë me taksën 1 euro mijëra metra katrorë në bregdet, dhe nga ana tjetër shteti iu bën të gjitha punimet rreth e përqark, duke shpenzuar miliona euro.
Pra, zonat ku operojnë të “favorizuarit” e qeverisë, të cilëve iu është dhënë një pronë shtetërore në bregdet me vlerën e 1 eurove. Veprime qesharake të shtetit shqiptar, i cili humb nga të dyja anët, duke favorizuar këto kompani. Qeveria nuk i ka paratë e veta, ato janë të shqiptarëve që paguajnë taksa, që nuk shkojnë për ta, po për një grusht njerëzish me lidhje të forta deri sipër në qeveri.
