Policia e Shkodrës ka parandaluar një ngjarje të mundshme kriminale, pasi ka arrestuar një person të armatosur, i cili ka tentuar të arratiset në momentin e ndërhyrjes së uniformave blu.
Në kuadër të operacionit policor të koduar “Kontigjenti” është vënë në pranga shtetasi Marjan (Zamir) Gjoni, 37 vjeç, banues në Vaun e Dejës, i dënuar më parë në Shqipëri, për veprimtari kriminale në fushën e narkotikëve dhe për mashtrim, si dhe në Francë, për veprimtari kriminale në fushën e narkotikëve
Autoritetet raportojnë se ai qarkullonte me automjet, me armë zjarri me vete, dyshohet se do të kryente ngjarje kriminale
“Drejtuesi i automjetit ka tentuar të largohet, por është neutralizuar dhe është vënë në pranga nga shërbimet e Policisë. Gjatë kontrollit në brendësi të automjetit tip “Audi”, poshtë sediljes së pasme të pasagjerit, Policia gjeti dhe sekuestroi një armë zjarri kallashnikov dhe 2 krehra me municion luftarak. Strukturat hetimore të Komisariatit të Policisë Vau i Dejës, në bashkëpunim me ato të Drejtorisë Vendore të Policisë Shkodër dhe në drejtimin e Prokurorisë, vijojnë hetimet e thelluara për zbardhjen dhe dokumentimin ligjor të qëllimit që kishte ky shtetas që qarkullonte me armë zjarri.” thuhet në njoftimin e Policisë.
Materialet procedurale i kaluan Prokurorisë së Shkodrës për veprime të mëtejshme.
